فوتو: Kursiv.kz
الاتاۋ قالاسىندا قازاقستانداعى العاشقى اەروتاكسيلەردىڭ سىناق ۇشۋى ءوتتى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
eVTOL (electric Vertical Take-Off and Landing aircraft) نەگىزىندەگى اۋە كولىكتەرىن سىناقتان وتكىزۋ شاراسىنا كاسىپكەرلەر، ينۆەستورلار جانە جەرگىلىكتى بيلىك وكىلدەرى قاتىستى.
سىناق بارىسىندا AutoFlight شىعارعان جولاۋشىلارعا ارنالعان eVTOL اپپاراتى تانىستىرىلدى. التى ورىنعا ارنالعان اەروتاكسيدە بەس جولاۋشى مەن ءبىر ۇشقىشقا ورىن قاراستىرىلعان. اپپارات ساعاتىنا 200 شاقىرىمعا دەيىن جىلدامدىقپەن ۇشىپ، ءبىر رەيستە 200 شاقىرىم قاشىقتىقتى ەڭسەرە الادى.
قاۋىپسىزدىك تالاپتارىنا سايكەس سىناق ۇشۋلارى جولاۋشىلارسىز وتكىزىلدى. قوناقتار مەن قاتىسۋشىلار اەروتاكسيدىڭ قوزعالىسىن ارنايى باقىلاۋ الاڭىنان تاماشالادى.
شاراعا قازاقستاندىق كاسىپكەر ۆياچەسلاۆ كيم، ينۆەستور يۋري تسحاي جانە مارات سۇلتانعازيەۆ قاتىستى.
جوبا اياسىندا اقش، برازيليا، ەۋروپا جانە قىتايداعى eVTOL وندىرۋشىلەرى اراسىندا حالىقارالىق تەندەر ۇيىمداستىرىلعان. ناتيجەسىندە يتاليا مەن وڭتۇستىك كورەيا كومپانيالارى جەتكىزۋشى رەتىندە تاڭدالعان.
قازىر يتاليالىق UrbanV وپەراتورى جانە Korea Airports Corporation كورپوراتسياسىمەن بىرلەسىپ، الاتاۋ قالاسىنىڭ Golden اۋدانىندا UAM Center Eurasia جوباسى ازىرلەنىپ جاتىر. بولاشاقتا بۇل ورتالىق قالالىق اۋە موبيلدىلىگى حابى ءارى ۆەرتيپورت رەتىندە جۇمىس ىستەمەك. اەروتاكسي وپەراتورلارى ارنايى دايىندىقتان ءوتىپ، ۇشقىشسىز اۆياتسيالىق جۇيەلەر وپەراتورلارىنىڭ سەرتيفيكاتتارىن العان. سونىمەن قاتار اۆياتسيالىق جۇمىستاردى ورىنداۋعا رۇقسات بەرىلگەن.
