ءماجىلىس دەپۋتاتى داۋلەت مۇقاەۆتىڭ جۇبايىن پارلامەنت اتريبۋتتارىن پايدالانىپ قۇتتىقتاعانىنا قاتىستى تەكسەرىس قورىتىندىسى جاريالاندى. ورتالىق سايلاۋ كوميسسياسى مەن ءماجىلىس اپپاراتى ونىڭ ءىس-ارەكەتتەرىنەن زاڭبۇزۋشىلىق انىقتاعان جوق، دەپ حابارلايدى "ادىرنا".
بۇعان دەيىن دەپۋتاتتىڭ كامەراسى بار سمارت-كوزىلدىرىك تاعىپ پارلامەنتكە كەلۋى جانە جۇبايىن پارلامەنتتىك اتريبۋتتاردى پايدالانىپ قۇتتىقتاعان ۆيدەوسى قوعامدا قىزۋ تالقىعا تۇسكەن بولاتىن.
الايدا رەسمي ورگانداردىڭ مالىمەتىنشە، بۇل جاعدايلار زاڭ تالاپتارىنا قايشى ەمەس. ءماجىلىس اپپاراتىنىڭ تۇسىندىرۋىنشە، ءتۇسىرىلىم پلەنارلىق وتىرىس زالىنىڭ الدىنداعى حوللدا جۇرگىزىلگەن. بۇل اۋماقتا فوتو جانە ۆيدەو تۇسىرۋگە رۇقسات ەتىلگەن.
ورتالىق سايلاۋ كوميسسياسى دەپۋتاتتارعا قاتىستى تارتىپتىك شارالار تەك پالاتا توراعاسىنىڭ نەمەسە پارلامەنت بيۋروسىنىڭ رەسمي جازباشا ءوتىنىشى تۇسكەن جاعدايدا عانا قارالاتىنىن مالىمدەدى.
وسىلايشا، تەكسەرىس ناتيجەسىندە داۋلەت مۇقاەۆقا قاتىستى زاڭبۇزۋشىلىق فاكتىسى راستالمادى.
