بۇگىن «AMANAT» پارتياسىنىڭ الماتى قالالىق فيليالىندا وتكەن «جەر اماناتى» كوميسسياسىنىڭ وتىرىسىندا Family Park اۋماعىنداعى جەر تەلىمىن پايدالانۋ زاڭدىلىعى تالقىلاندى.
بۇعان قالا تۇرعىندارىنان تۇسكەن كوپتەگەن ءوتىنىش پەن ساياباقتىڭ قازىرگى جاعدايىنا قاتىستى شاعىم سەبەپ بولعان.
بۇعان دەيىن الماتى قالاسى ءماسليحاتىنىڭ دەپۋتاتتارى قوعامدىق كەڭەس مۇشەلەرىمەن بىرگە ساياباققا ارنايى بارىپ، مونيتورينگ جۇرگىزگەن بولاتىن. تەكسەرۋ بارىسىندا بىرقاتار تۇيتكىلدى ماسەلە انىقتالدى. اتاپ ايتقاندا، اۋماقتىڭ سانيتارلىق جاعدايىنىڭ تومەندىگى، ينفراقۇرىلىمنىڭ توزۋى، اتتراكتسيونداردىڭ تەحنيكالىق جاي-كۇيى، جاسىل جەلەكتىڭ كۇتىمىنىڭ جەتكىلىكسىزدىگى جانە ۇزاق ۋاقىت بويى نىساندى دامىتۋ جۇمىستارىنىڭ باياۋ ءجۇرۋى بايقالعان.
جيىنعا الماتى قالاسىنىڭ پروكۋراتۋراسى، جەر رەسۋرستارىن باسقارۋ دەپارتامەنتى، پوليتسيا دەپارتامەنتى، توتەنشە جاعدايلار دەپارتامەنتى، اۋەزوۆ اۋدانى اكىمدىگى جانە باسقا دا ۋاكىلەتتى ورگانداردىڭ وكىلدەرى قاتىستى.
«AMANAT» پارتياسى الماتى قالالىق فيليالىنىڭ توراعاسى ستانيسلاۆ كانكۋروۆتىڭ ايتۋىنشا، Family Park جايى جەكەمەنشىك دەڭگەيىنەن شىعىپ، قالا تۇرعىندارىنىڭ ورتاق الەۋمەتتىك ماسەلەسىنە اينالعان. 
«Family Park – بۇل جاي عانا كوممەرتسيالىق نىسان ەمەس، تۇرعىندار ءۇشىن الەۋمەتتىك ماڭىزى بار قوعامدىق كەڭىستىك، قالا تۇرعىندارىنىڭ سۇيىكتى دەمالىس ورىندارىنىڭ ءبىرى. بۇگىندە ساياباقتىڭ قاناعاتتانارلىقسىز جاعدايدا ەكەنىن، ءتيىستى دەڭگەيدە دامىماي وتىرعانىن كورىپ وتىرمىز. بۇل ماسەلەگە قاتىستى تۇرعىنداردىڭ شاعىمى ازايماي وتىر. ەگەر جەر تەلىمىن پايدالانۋشى وزىنە جۇكتەلگەن مىندەتتەمەلەردى ورىنداماسا، قالا تۇرعىندارى ءۇشىن قاۋىپسىز ءارى قولايلى جاعداي قامتاماسىز ەتپەسە، وندا زاڭدا كوزدەلگەن شارالار، ءتىپتى نىساندى مەملەكەت مەنشىگىنە قايتارۋعا دەيىنگى شەشىمدەر قابىلدانۋعا ءتيىس»، – دەپ اتاپ ءوتتى ستانيسلاۆ كانكۋروۆ.
الماتى قالاسى جەر رەسۋرستارىن باسقارۋ دەپارتامەنتىنىڭ باسشىسى ەرجان تاشپەنبەتوۆ تەكسەرۋ بارىسىندا جەر تەلىمىن بەرۋ زاڭدىلىعىنا قاتىستى بۇزۋشىلىقتار انىقتالعانىن مالىمدەدى.
«تەكسەرۋ ناتيجەسىندە جەر تەلىمىنىڭ نىسانالى ماقساتىن وزگەرتۋ جانە كەيىننەن جالداۋ شارتىن جاساۋ زاڭنامادا بەلگىلەنگەن ءتارتىپ بويىنشا جەر پايدالانۋ قۇقىعىن باستاپقى بەرۋ ءراسىمى ءتيىستى دەڭگەيدە جۇرگىزىلمەي جۇزەگە اسىرىلعانى انىقتالدى. انىقتالعان زاڭبۇزۋشىلىقتارعا بايلانىستى دەپارتامەنت تاراپىنان ولاردى جويۋ تۋرالى ءتيىستى نۇسقامالار بەرىلدى. بەلگىلەنگەن مەرزىمدە تالاپتار ورىندالماسا، اكىمدىك قاۋلىسى مەن جەر تەلىمىن جالداۋ شارتىن جارامسىز دەپ تانۋ تۋرالى سوتقا تالاپ-ارىز جولدانادى»، – دەدى ەرجان تاشپەنبەتوۆ.
كوميسسيا مۇشەلەرى جيىن سوڭىندا قالا تۇرعىندارىنىڭ مۇددەسىن قورعاۋ، زاڭدىلىقتى ساقتاۋ جانە الەۋمەتتىك ماڭىزى بار اۋماقتاردى ءتيىمدى پايدالانۋ بويىنشا ناقتى شارالار قابىلداۋ قاجەت ەكەنىن اتاپ ءوتتى.
«AMANAT» پارتياسى بۇل ماسەلەنى الماتى تۇرعىندارىنىڭ مۇددەسىنە ساي تۇپكىلىكتى شەشىم قابىلدانعانعا دەيىن باقىلاۋدا ۇستايتىنىن ايتتى.
