22 مامىردا Eurasian Resources Group اكتسيونەرلەر قۇرىلىمىنداعى وزگەرىستەر تۋرالى مالىمدەدى. كومپانيانىڭ مالىمەتىنشە، ERG اكتسيالارىنىڭ 39,3 پايىزىن كاسىپكەر شاحمۇرات مۇتالىپكە تيەسىلى Nature Energy Solutions Ltd. كومپانياسى ساتىپ العان، دەپ حابارلايدى «ادىرنا» ءتىلشىسى.
بۇل ۇلەس اكتسيالاردىڭ 18,6%-ىنا يەلىك ەتكەن پاتوح شوديەۆتەن، سونداي-اق كومپانيانىڭ 20,7% اكتسياسىنا يە بولعان الەكساندر ماشكەۆيچءتىڭ مۇراگەرلەرىنەن ساتىپ الىنعان.
«ERG-ءتىڭ بارلىق كاسىپورىنى شتاتتىق رەجيمدە جۇمىس ىستەپ جاتىر. بۇل وزگەرىستەر بيزنەستىڭ تۇراقتىلىعىن ودان ءارى نىعايتۋعا، كورپوراتيۆتىك باسقارۋ تيىمدىلىگىن ارتتىرۋعا جانە توپتىڭ ۇزاقمەرزىمدى دامۋ ستراتەگياسىن جۇزەگە اسىرۋعا باعىتتالعان»، — دەلىنگەن كومپانيا حابارلاماسىندا.
كومپانيا وكىلدەرى وزگەرىستەردىڭ قازىرگى وپەراتسيالىق قىزمەتكە، وندىرىستىك باعدارلامالاردىڭ ورىندالۋىنا جانە قىزمەتكەرلەر، سەرىكتەستەر مەن مەملەكەت الدىنداعى مىندەتتەمەلەرگە اسەر ەتپەيتىنىن مالىمدەدى.
ەسكە سالايىق، 2025 جىلدىڭ جەلتوقسانىندا Financial Times باسىلىمى ءمۇتالىپتىڭ ERG-دەگى ۇلەسكە قىزىعۋشىلىق تانىتقانى تۋرالى جازعان ەدى. باسىلىم مالىمەتىنشە، قازاقستاندىق كاسىپكەر شوديەۆ پەن ماشكەۆيچ مۇراگەرلەرىنىڭ ۇلەسىن ساتىپ الۋدى جوسپارلاپ، ولاردىڭ ورتاق ۇلەسىن 1,4 ملرد دوللارعا ساتىپ الۋ شارتتارىن الدىن الا كەلىسكەن. وسىنداي ۇسىنىستى ERG نەگىزىن قالاۋشىلاردىڭ ءبىرىنىڭ ۇلى شۋحرات يبراگيموۆ تا جاساعان، الايدا ونىڭ كەلىسسوزدەرى ناتيجە بەرمەگەن.
شاحمۇرات ءمۇتالىپ Forbes Kazakhstan جۋرنالىنىڭ 2026 جىلعى ەڭ باي بيزنەسمەندەر رەيتينگىندە 22-ورىنعا كوتەرىلگەن ەدى. باسىلىم ونىڭ بايلىعىن 482 ملن دوللارعا باعالاعان.
