قاراعاندى وبلىسى اۋماعىندا قۇربان ايت مەرەكەسى جاقىنداعان سايىن قۇرباندىققا شالىناتىن مال مەن ەت ونىمدەرىنىڭ باعاسىنىڭ نەگىزسىز وسۋىنە جول بەرمەۋ ماقساتىندا باقىلاۋ شارالارى كۇشەيتىلدى. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ماماندارى مال سويۋ پۋنكتتەرىن ارالاپ، شارۋا قوجالىقتارى مەن كاسىپكەرلەر وكىلدەرىمەن بىرقاتار ءتۇسىندىرۋ كەزدەسۋلەرىن وتكىزدى.
كەزدەسۋلەر بارىسىندا حالىقتى ساپالى ەت ونىمدەرىمەن قامتاماسىز ەتۋ، سونداي-اق مەرەكە كۇندەرى نارىقتاعى باعانىڭ تۇراقتىلىعىن ساقتاۋ ماسەلەلەرى جان-جاقتى قاراستىرىلدى.
— ءبىز اۋىل شارۋاشىلىعى تاۋار وندىرۋشىلەرىمەن جانە ساۋدا وكىلدەرىمەن كەزدەستىك. قازىرگى تاڭدا قوي ەتىنىڭ ورتاشا باعاسى كەلىسىنە شامامەن 4 مىڭ تەڭگە دەڭگەيىندە قالىپ وتىر. ءبىر جاسار قوزىنىڭ باعاسى ورتا ەسەپپەن 80 مىڭ تەڭگەنى قۇرايدى. بارلىق نارىق قاتىسۋشىلارىنا سۇرانىستىڭ ارتۋىن تەرىس پايدالانباي، باعانى نەگىزسىز كوتەرمەۋ جونىندە قاتاڭ ەسكەرتۋ جاسالدى، — دەدى ءانۋار تولەبەكوۆ، وبلىستىق اۋىل شارۋاشىلىعى باسقارماسىنىڭ باسشىسى.
كاسىپكەرلەردىڭ ايتۋىنشا، بۇگىندە وڭىردە ەت قورى جەتكىلىكتى كولەمدە قالىپتاسقان، سوندىقتان مەرەكە كەزەڭىندە تاپشىلىق تۋىنداۋى كۇتىلمەيدى.
اۋىل شارۋاشىلىعى باسقارماسى تاراپىنان مەرەكە كۇندەرى باعاعا تۇراقتى مونيتورينگ جۇرگىزۋ جالعاساتىنى اتاپ ءوتىلدى. قازىرگى تاڭدا نارىقتاعى احۋال تۇراقتى ءارى قاتاڭ باقىلاۋدا.
