وزبەكستان پرەزيدەنتى شاۆكات ميرزيوەۆ قۇربان ايت مەرەكەسىنە بايلانىستى الەۋمەتتىك-ەكونوميكالىق قولداۋعا مۇقتاج حالىققا كومەك كورسەتۋ جونىندەگى ۇسىنىستاردىڭ تانىستىرىلىمىمەن تانىستى. بۇل تۋرالى پرەزيدەنتتىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
تانىستىرىلىمدا وزبەكستان مۇسىلماندارى باسقارماسى، ۇلتتىق الەۋمەتتىك قورعاۋ اگەنتتىگى، دەنساۋلىق ساقتاۋ مينيسترلىگى، ەكونوميكا جانە قارجى مينيسترلىگى، وزبەكستان ماحاللا قاۋىمداستىعى، سونداي-اق «ۆاكف» قايىرىمدىلىق قوعامدىق قورى ازىرلەگەن ۇسىنىستار قارالدى.
ۇسىنىستارعا سايكەس، قۇربان ايت قارساڭىندا اۋقىمدى الەۋمەتتىك شارالار وتكىزۋ جوسپارلانعان. اتاپ ايتقاندا، اۋىر جانە مۇگەدەكتىككە اكەلەتىن اۋرۋلارى بار 10 مىڭ بالاعا حيرۋرگيالىق وپەراتسيا جاساۋ، 2,3 مىڭ ونكولوگيالىق جانە گەماتولوگيالىق ناۋقاستى تەكسەرىپ ەمدەۋ، سونداي-اق باۋىر مەن بۇيرەك ترانسپلانتاتسياسىنا كەتكەن شىعىنداردى كەمىندە 350 ناۋقاسقا وتەۋ كوزدەلگەن.
سونىمەن قاتار، 8 مىڭنان استام جەتىم جانە اتا-اناسىنىڭ قامقورلىعىنسىز قالعان بالالارعا، سونداي-اق قىزمەتتىك بورىشىن وتەۋ كەزىندە قازا تاپقان اسكەري قىزمەتشىلەردىڭ بالالارىنا جيناق شوتتارىنا 200 اقش دوللارى كولەمىندە قاراجات اۋدارۋ قاراستىرىلعان.
بۇدان بولەك، 500 مەشىتتە دارەت الاتىن ورىنداردى سالۋ نەمەسە جوندەۋ، زيراتتاردى اباتتاندىرۋ جانە الەۋمەتتىك تۇرعىدا وسال وتباسىلاردى ازىق-تۇلىكپەن قامتاماسىز ەتۋ جوسپارلانعان.
بۇل شارالاردى قارجىلاندىرۋعا 690 ميلليارد سۋم بولىنەتىنى ايتىلدى. پرەزيدەنت جاۋاپتى تۇلعالارعا بارلىق جۇمىستاردى اشىق ءارى ناقتى ماقساتقا باعىتتاپ ۇيىمداستىرۋدى تاپسىردى.
