بۇگىن ايماق باسشىسى ناريمان تورەعاليەۆتىڭ تاپسىرماسىمەن ورال قالاسىنىڭ اكىمى مۇرات بايمەنوۆ تىل ەڭبەككەرى، سانالى عۇمىرىن ۇستازدىق قىزمەتكە ارناعان ارداگەر ساندەش جاقاشەۆانىڭ شاڭىراعىنا ارنايى بارىپ، قال-جاعدايىن ءبىلدى.
كەزدەسۋدە ارداگەر ۇستازدىڭ ونەگەلى ءومىر جولى، ۇرپاق تاربيەسىنە قوسقان ەلەۋلى ۇلەسى تۋرالى اڭگىمە ءوربىدى. قالا اكىمى سوعىس جانە تىل ارداگەرلەرىن الەۋمەتتىك قولداۋ پرەزيدەنتتىڭ، ءوڭىر باسشىلىعىنىڭ تىكەلەي نازارىندا ەكەنىن ايتا كەلە، كەيۋاناعا قۇرمەت كورسەتىپ، ىزگى تىلەگىن جەتكىزدى.
ءوز كەزەگىندە ساندەش جاقاشەۆا كورسەتىلگەن ىلتيپاتقا ريزاشىلىعىن ءبىلدىرىپ، اق باتاسىن بەردى.
– ەلگە ادال قىزمەت ەتۋ – ەڭ ۇلكەن پارىز. حالىقتىڭ العىسىن الۋ – زور باقىت. شۇكىر، اسپانىمىز اشىق. جاس تولقىندى تاربيەلى، ءبىلىمدى، ەڭبەكقور بولۋعا شاقىرامىن. ارنايى كەلىپ، جاعدايىمدى سۇراپ جاتقاندارىڭىزعا كوپ راقمەت، – دەدى ارداگەر ۇستاز.
ايتا كەتەيىك، بقو-دا سوعىس جانە تىل ارداگەرلەرىنە قۇرمەت كورسەتۋ، ولاردىڭ الەۋمەتتىك جاعدايىنا كوڭىل ءبولۋ جانە اعا بۋىن وكىلدەرىنە قولداۋ ءبىلدىرۋ باعىتىنداعى جۇمىستار تۇراقتى تۇردە جالعاسۋدا. تىل ەڭبەككەرى ساندەش جاقاشەۆاعا دا بىرجولعى الەۋمەتتىك تولەم تابىستالدى.
