اقمولا وبلىسىنىڭ اكىمى مارات مۇراتۇلى احمەتجانوۆتىڭ قولداۋىمەن اقمولا ءوڭىرىنىڭ ۇزدىك شىعارماشىلىق ۇجىمدارىنىڭ ءبىرى، حالىقارالىق جانە رەسپۋبليكالىق بايقاۋلاردىڭ لاۋرەاتى، «كوكشەتاۋ» مادەنيەت سارايى جانىنداعى 25 جىلدىق تاريحى بار «ون التى قىز» حالىقتىق بي ءانسامبلى تۇركيا رەسپۋبليكاسىنىڭ مەندەرەس، گۋمۋلدۋر جانە وزدەرە (يزمير) قالالارىندا وتكەن VI حالىقارالىق ونەر فەستيۆالى مەن «ماندارين كۋبوگى – 2026» بايقاۋىنا قاتىسىپ، جوعارى ناتيجە كورسەتتى.
«Sunu Event Company» ۇيىمداستىرۋشىلارىنىڭ رەسمي شاقىرۋىمەن بارعان شىعارماشىلىق ۇجىم قۇرامىندا ءانسامبلدىڭ 16 ءبيشىسى، انسامبل جەتەكشىسى مادينا تەمەربۋلاتقىزى دۋسموگومبەتوۆا جانە «كوكشەتاۋ» مادەنيەت سارايىنىڭ ديرەكتورى ءاليا نۇرسۇلتانقىزى قۇرمانوۆا بولدى.
الەمنىڭ ءارتۇرلى ەلدەرىنەن كەلگەن ونەر ۇجىمدارىنىڭ باسىن قوسقان حالىقارالىق فەستيۆال مادەني بايلانىستاردى نىعايتۋعا، حالىق شىعارماشىلىعىن دامىتۋعا جانە دوستىق قارىم-قاتىناستى ارتتىرۋعا باعىتتالعان ماڭىزدى مادەني الاڭعا اينالدى.
بايقاۋ اياسىندا انسامبل بىرنەشە ۇلتتىق بي قويىلىمدارىن كورەرمەن نازارىنا ۇسىندى. العاشقى ونەر كورسەتۋ وزدەرە قالاسىندا ءوتىپ، ۇجىم حورەوگراف مادينا تەمەربۋلاتقىزىنىڭ «قىز عۇمىرى» حورەوگرافيالىق قويىلىمىن ورىندادى. قازاق قىزىنىڭ نازىكتىگى مەن ىشكى جان دۇنيەسىن بەينەلەيتىن بۇل بي شەتەلدىك كورەرمەننىڭ ىستىق ىقىلاسىنا بولەندى.
سونىمەن قاتار انسامبل رەپەرتۋارىنداعى «قىز دۋمانى»، «ايجان قىز»، «اققۋ»، «قۋانىش»، «بىلقىلداق» سىندى ۇلتتىق ناقىشتاعى قويىلىمدار قازاق حالقىنىڭ باي مادەني مۇراسى مەن بي ونەرىنىڭ كوركەمدىگىن پاش ەتتى. ءار بي ارقىلى ساحنادا ۇلتتىق بولمىس، اسەمدىك، نازىكتىك پەن قازاق ونەرىنىڭ رۋحى كورىنىس تاپتى.
بايقاۋ قورىتىندىسى بويىنشا انسامبل باس جۇلدەنى جەڭىپ الدى. سونىمەن قاتار ۇجىم «ەڭ ۇزدىك قويىلىم» جانە «ەرەكشە كەرەمەت كوستيۋم» نوميناتسيالارىمەن ماراپاتتالدى.
فەستيۆال ۇيىمداستىرۋشىلارى انسامبل ونەرىنە جوعارى باعا بەرىپ، ەرەكشە العىستارىن ءبىلدىردى. سونداي-اق ۇجىمعا الداعى حالىقارالىق فەستيۆالدەر مەن بايقاۋلارعا ارنايى شاقىرۋ جولداپ، شىعارماشىلىق تابىس تىلەدى.
«ون التى قىز» ءانسامبلىنىڭ حالىقارالىق فەستيۆالدەگى جارقىن جەتىستىگى قازاقستاندىق ونەردىڭ الەمدىك ساحناداعى ابىرويىن ارتتىرىپ، ۇلتتىق مادەنيەتتى حالىقارالىق دەڭگەيدە كەڭىنەن ناسيحاتتاۋعا قوسىلعان ماڭىزدى ۇلەس بولدى.
