قاراعاندىدا كوپقاباتتى ءۇيدىڭ جوعارعى قاباتىنان قۇلاپ كەتكەن ءۇش جاسار بالانىڭ ءومىرىن پاترۋلدىك پوليتسيا قىزمەتكەرلەرى قۇتقارىپ قالدى، دەپ حابارلايدى "ادىرنا" ۇلتتىق پورتالى.
ولاردىڭ جەدەل ارەكەتى الەۋمەتتىك جەلى قولدانۋشىلارىنىڭ العىسىنا بولەندى. جەلىدە تاراعان جازبادا تۇرعىندار پاترۋلدىك پوليتسيا قىزمەتكەرلەرى ءىلياس اتبەكوۆ پەن ماگومەد ياكۋبوۆتى ارنايى ىزدەپ تاۋىپ، ريزاشىلىقتارىن بىلدىرگەنى ايتىلعان.
جاراقات العان ءبۇلدىرشىندى كورگەن پوليتسەيلەر ونى بىردەن قىزمەتتىك كولىككە وتىرعىزىپ، ارنايى دابىل قوسىلعان كۇيدە اۋرۋحاناعا جەتكىزگەن. سونىڭ ارقاسىندا دارىگەرلەر بالاعا ۋاقىتىلى مەديتسينالىق كومەك كورسەتىپ، ونىڭ ءومىرىن ساقتاپ قالعان.
كۋاگەرلەردىڭ ايتۋىنشا، وقيعا ورنىندا اتا-انالار مەن تۇرعىندار قاتتى ابدىراپ قالعان. سول سەبەپتى ولار بالانى اۋرۋحاناعا جەتكىزگەن پوليتسەيلەردىڭ اتى-ءجونىن سۇراپ ۇلگەرمەگەن. ال پاترۋلدىك ەكيپاج دارىگەرلەرگە بالانى تاپسىرعاننان كەيىن قايتادان قىزمەتتىك مىندەتىن اتقارۋعا كىرىسكەن.
كەيىن تۇرعىندار باتىر پوليتسەيلەردى قىزمەتتىك كولىكتىڭ مەملەكەتتىك ءنومىرى ارقىلى تاۋىپ، العىسىن جەتكىزگەن.
