بالا قۇقىقتارى جونىندەگى ۋاكىل دينارا زاكيەۆا حالىقارالىق بالالاردى قورعاۋ كۇنىنە وراي قازاقستاندىقتاردى مەرەكەمەن قۇتتىقتاپ، ەلىمىزدە بالالاردى قورعاۋ جۇيەسىن نىعايتۋ باعىتىندا اتقارىلعان جۇمىستار تۋرالى ايتتى، دەپ حابارلايدى «ادىرنا» ءتىلشىسى.
«بۇگىن ءداستۇرلى تۇردە حالىقارالىق بالالاردى قورعاۋ كۇنى اتالىپ وتىلۋدە. ءاربىر بالاعا ارناپ، وڭىرلەردەگى كەزدەسۋلەردە ءجيى ايتاتىن ءسوزىمىزدى تاعى دا قايتالاعىم كەلەدى: «بالا – ەڭ جوعارى قۇندىلىق. بالالارعا قامقورلىق جاساۋ – مەملەكەتتىڭ باستى باسىمدىعى. مەملەكەت باسشىسى قاسىم-جومارت كەمەلۇلى توقاەۆ بالا قورعاۋ جانە قولداۋ ماسەلەلەرىنە ءاردايىم ەرەكشە كوڭىل بولەدى. ءار بالانىڭ ءومىرى ماڭىزدى، ونىڭ قۇقىقتارى، ءال-اۋقاتى، قاۋىپسىزدىگى مەملەكەت قورعاۋىندا. وسى ماقساتتا ەلىمىزدە بارلىق قاجەت زاڭ قابىلدانىپ، ارنايى قىزمەتتەر قۇرىلدى جانە ءالى دە قۇرىلۋدا. ارقايسىڭىز بالالار قورعاۋشىسى بولا الاسىزدار. ەڭ باستىسى – وزىڭىزگە نەمەسە باسقا بالاعا كومەك قاجەت بولعان جاعدايدا بۇل تۋرالى ايتۋعا جانە حابارلاۋعا قورىقپاڭىزدار»،–دەدى ول.
زاكيەۆانىڭ سوزىنشە، قازاقستاندا بالا قۇقىقتارى زاڭنامالىق جانە ينستيتۋتسيونالدىق دەڭگەيلەردە بەكىتىلگەن.
«پرەزيدەنت قاسىم-جومارت كەمەلۇلى توقاەۆتىڭ تاپسىرماسىمەن، كەيىنگى بىرنەشە جىلدا بالالاردى قورعاۋ جۇيەسى مەن ينفراقۇرىلىمىن قالىپتاستىرۋعا باعىتتالعان ماڭىزدى رەفورمالار جۇرگىزىلىپ، زاڭدار مەن باعدارلامالار قابىلداندى.
قولدانىستاعى بارلىق مەحانيزمدەر مەن الداعى جىلدارعا ارنالعان ءىس-قيمىل جوسپارى، جۇمىستى جەتىلدىرۋ، جاڭا تاسىلدەردى ەنگىزۋ، قىزمەتكەرلەردى وقىتۋ، جالاقى ارتتىرۋ، سونداي-اق قاۋىپسىزدىك، الەۋمەتتىك قورعاۋ، دەنساۋلىق ساقتاۋ جانە ءبىلىم بەرۋ سالالارىنداعى وزەكتى مىندەتتەردى شەشۋ ماسەلەلەرى جىل باسىندا قابىلدانعان «قازاقستان بالالارى» ۇلتتىق ستراتەگياسى مەن باعدارلاماسىندا كورىنىس تاپتى»،–دەدى ۋاكىل.
سونداي-اق ول بالالاردى قورعاۋ سالاسىنداعى ماڭىزدى جاڭالىقتارعا دا توقتالدى.
«بالالاردى قورعاۋ سالاسىنداعى ەڭ ماڭىزدى وقيعالاردىڭ ءبىرى – 2024 جىلدان بەرى جۇرگىزىلگەن جۇمىس ناتيجەسىندە ءار وڭىرلىك اكىمدىكتەر قۇرىلىمىندا بالالاردىڭ قۇقىقتارىن قورعاۋ باسقارمالارىنىڭ قۇرىلۋى. ولاردىڭ قۇرىلۋى مەن قىزمەتتەرى «بالا قۇقىقتارى تۋرالى» زاڭدا بەكىتىلدى، بارلىق قاجەت راسىمدەر ءوتىپ، قاۋلىلار قابىلداندى، قۇرىلىم مەن شتات قالىپتاستىرىلۋدا. بۇل – بالالاردى قورعاۋ سالاسى ءۇشىن ۇلكەن جەتىستىك. بۇعان دەيىن جەرگىلىكتى اتقارۋشى ورگاندار جۇيەسىندە بالالاردىڭ قۇقىقتارىن قورعاۋمەن اينالىساتىن جەكە قۇرىلىم بولعان جوق»،–دەپ تولىقتىردى ول.
