Bala qūqyqtary jönındegı uäkıl Dinara Zäkieva Halyqaralyq balalardy qorǧau künıne orai qazaqstandyqtardy merekemen qūttyqtap, elımızde balalardy qorǧau jüiesın nyǧaitu baǧytynda atqarylǧan jūmystar turaly aitty, dep habarlaidy «Adyrna» tılşısı.
«Bügın dästürlı türde Halyqaralyq balalardy qorǧau künı atalyp ötılude. Ärbır balaǧa arnap, öŋırlerdegı kezdesulerde jiı aitatyn sözımızdı taǧy da qaitalaǧym keledı: «Bala – eŋ joǧary qūndylyq. Balalarǧa qamqorlyq jasau – memlekettıŋ basty basymdyǧy. Memleket basşysy Qasym-Jomart Kemelūly Toqaev bala qorǧau jäne qoldau mäselelerıne ärdaiym erekşe köŋıl böledı. Är balanyŋ ömırı maŋyzdy, onyŋ qūqyqtary, äl-auqaty, qauıpsızdıgı memleket qorǧauynda. Osy maqsatta elımızde barlyq qajet zaŋ qabyldanyp, arnaiy qyzmetter qūryldy jäne älı de qūryluda. Ärqaisyŋyz balalar qorǧauşysy bola alasyzdar. Eŋ bastysy – özıŋızge nemese basqa balaǧa kömek qajet bolǧan jaǧdaida būl turaly aituǧa jäne habarlauǧa qoryqpaŋyzdar»,–dedı ol.
Zäkievanyŋ sözınşe, Qazaqstanda bala qūqyqtary zaŋnamalyq jäne institusionaldyq deŋgeilerde bekıtılgen.
«Prezident Qasym-Jomart Kemelūly Toqaevtyŋ tapsyrmasymen, keiıngı bırneşe jylda balalardy qorǧau jüiesı men infraqūrylymyn qalyptastyruǧa baǧyttalǧan maŋyzdy reformalar jürgızılıp, zaŋdar men baǧdarlamalar qabyldandy.
Qoldanystaǧy barlyq mehanizmder men aldaǧy jyldarǧa arnalǧan ıs-qimyl jospary, jūmysty jetıldıru, jaŋa täsılderdı engızu, qyzmetkerlerdı oqytu, jalaqy arttyru, sondai-aq qauıpsızdık, äleumettık qorǧau, densaulyq saqtau jäne bılım beru salalaryndaǧy özektı mındetterdı şeşu mäselelerı jyl basynda qabyldanǧan «Qazaqstan balalary» ūlttyq strategiiasy men baǧdarlamasynda körınıs tapty»,–dedı uäkıl.
Sondai-aq ol balalardy qorǧau salasyndaǧy maŋyzdy jaŋalyqtarǧa da toqtaldy.
«Balalardy qorǧau salasyndaǧy eŋ maŋyzdy oqiǧalardyŋ bırı – 2024 jyldan berı jürgızılgen jūmys nätijesınde är öŋırlık äkımdıkter qūrylymynda Balalardyŋ qūqyqtaryn qorǧau basqarmalarynyŋ qūryluy. Olardyŋ qūryluy men qyzmetterı «Bala qūqyqtary turaly» zaŋda bekıtıldı, barlyq qajet räsımder ötıp, qaulylar qabyldandy, qūrylym men ştat qalyptastyryluda. Būl – balalardy qorǧau salasy üşın ülken jetıstık. Būǧan deiın jergılıktı atqaruşy organdar jüiesınde balalardyŋ qūqyqtaryn qorǧaumen ainalysatyn jeke qūrylym bolǧan joq»,–dep tolyqtyrdy ol.
