Qorǧanys ministrlıgı äskerde auqymdy reforma jürgızudı qajet emes dep tapty, dep habarlaidy “Adyrna” ūlttyq portaly.
Būl turaly vedomstvo basşysynyŋ tärbie jäne ideologiialyq jūmys jönındegı orynbasary Asqar Mūstabekov Senat kuluarynda mälımdedı.
Onyŋ aituynşa, ministrlık tärbie, ideologiialyq jäne psihologiialyq jūmysty küşeituge basymdyq berıp otyr.
«Ülken reformalar jasauǧa qajettılık joq dep oilaimyn. Bız tärbielık jäne ideologiialyq baǧyttaǧy jūmysty küşeitıp jatyrmyz. Psihologiialyq körsetkışter boiynşa zertteulerdı arttyrdyq. Öitkenı är komandir sarbazdyŋ oiynda ne bar ekenın aldyn ala boljai almaidy. Sondyqtan komandir psihologpen bırlese jūmys ıstep, qauıp-qaterdı erte kezeŋde anyqtaidy», – dedı Asqar Mūstabekov.
Ministrlık ökılınıŋ aituynşa, äskerdegı suisid jaǧdailary azaiyp keledı.
Onyŋ mälımetınşe, 2025 jyly ekı suisid faktısı tırkelgen, al 2024 jyly mūndai üş jaǧdai bolǧan.
Sondai-aq qorǧanys ministrlıgı äskeri bölımderde beinebaqylau jüiesın engızudı jalǧastyryp jatyr. Qazırgı taŋda el boiynşa 15 myŋnan astam beinekamera ornatylǧan.
«Qazır barlyq äskeri bölımderdı tolyq qamtu üşın jūmys jürgızılıp jatyr. “Ölı aimaqtar” bolmauy tiıs. Sonymen qatar pilottyq rejimde keibır bölımderde jasandy intellekt elementterı bar kameralar ornatyluda. Olar tärtıp būzuşylyqtardy anyqtap, komandirlerge nemese kezekşı qyzmetke habar beredı», – dedı Mūstabekov.
Onyŋ sözınşe, äskeri bölımderde tötenşe jaǧdailar oryn alǧan jaǧdaida mındettı türde tergeu jürgızılıp, ministrlık basşylyǧy oqiǧa ornyna şyǧady.
