Jaŋa Konstitusiia jobasy – sarapşylar men qoǧam ökılderınıŋ ūzaq ärı tiianaqty eŋbegınıŋ nätijesınde äzırlengen bıregei tarihi qūjat. Ol jalpyhalyqtyq referendumǧa şyǧaruǧa tolyq daiyn. Būl turaly Mäjılıs deputaty Aidos Sarym Konstitusiialyq reforma jönındegı komissiianyŋ 12-şı otyrysynda mälımdedı.
Aidos Sarymnyŋ aituynşa, jaŋa Konstitusiiany daiyndau barysynda bırqatar maŋyzdy serpındı qadamdar jasaldy.
«Bırlese jäne üilesımdı atqarylǧan jūmystyŋ arqasynda qajettı qūqyqtyq normalar men tūjyrymdardy taba aldyq. Olar juyrda azamattarymyzdyŋ ömırın oŋ baǧytta özgertıp, memleketımız ben qoǧamymyzdyŋ jaŋa kelbetın qalyptastyruǧa yqpal etedı», – dedı deputat.
Onyŋ sözınşe, jaŋa Ata zaŋnyŋ jobasy Qazaqstannyŋ tarihi damu jolyn jan-jaqty eskerıp, memlekettılıktıŋ sabaqtastyǧyn aiqyndaidy.
«Tarihşy ärı mūraǧatşy retınde mūndai ūstanym men üşın airyqşa qūndy. Bız jaŋa taǧdyrdyŋ, ortaq bolaşaqtyŋ Konstitusiiasyn jasadyq dep şynaiy senımmen aita alamyn», – dedı Aidos Sarym.
Sondai-aq ol qūjatta ūlttyq qauıpsızdık, el bırlıgı men qoǧamdyq kelısımdı saqtau, Qazaqstan şekarasynyŋ myzǧymastyǧyn qamtamasyz etu mäselelerı tolyq qamtylǧanyn atap öttı.
Būdan bölek, Qazaqstan öz Konstitusiiasynda alǧaş ret ǧylym, bılım, mädeniet jäne innovasiia salalarynyŋ basymdyǧyn aiqyndap otyr.
«Bız älemdegı alǧaşqy memleketterdıŋ bırı bolyp azamattardyŋ sifrlyq qūqyqtaryn Ata zaŋ deŋgeiınde bekıtıp otyrmyz. Däl osy salalarda memleketter arasyndaǧy basty bäsekelestık jüredı. Bız aşyq, adal ärı örkeniettı bäsekege daiynbyz», – dedı deputat.
Sonymen qatar, onyŋ aituynşa, Konstitusiia jobasynda «Zaŋ men Tärtıp» qaǧidattary ūlttyq basymdyq retınde aiqyndalyp, qazaqstandyqtardyŋ el tabiǧatynyŋ taǧdyryna ortaq ekologiialyq jauapkerşılıgı bekıtılgen.
«Bızdıŋ Konstitusiia jobamyz – būl erkındık, tärtıp, zaŋdylyq jäne özara jauapkerşılık Konstitusiiasy», – dedı Aidos Sarym.
Söz soŋynda ol jaŋa Konstitusiiany äzırleu barysynda auqymdy ärı mūqiiat jūmys jürgızılgenın atap öttı.
«Qazırgı nūsqada ony Prezidentke ūsynyp, jalpyhalyqtyq referendumǧa şyǧaruǧa äbden bolady dep senemın. Bız respublikalyq ştab qūryp, elımızdıŋ barlyq öŋırıne baryp, ärbır azamatpen aşyq ärı senımdı dialog jürgızuge daiynbyz», – dep tüiındedı deputat.
