جاڭا كونستيتۋتسيا جوباسى – ساراپشىلار مەن قوعام وكىلدەرىنىڭ ۇزاق ءارى تياناقتى ەڭبەگىنىڭ ناتيجەسىندە ازىرلەنگەن بىرەگەي تاريحي قۇجات. ول جالپىحالىقتىق رەفەرەندۋمعا شىعارۋعا تولىق دايىن. بۇل تۋرالى ءماجىلىس دەپۋتاتى ايدوس سارىم كونستيتۋتسيالىق رەفورما جونىندەگى كوميسسيانىڭ 12-ءشى وتىرىسىندا مالىمدەدى.
ايدوس سارىمنىڭ ايتۋىنشا، جاڭا كونستيتۋتسيانى دايىنداۋ بارىسىندا بىرقاتار ماڭىزدى سەرپىندى قادامدار جاسالدى.
«بىرلەسە جانە ۇيلەسىمدى اتقارىلعان جۇمىستىڭ ارقاسىندا قاجەتتى قۇقىقتىق نورمالار مەن تۇجىرىمداردى تابا الدىق. ولار جۋىردا ازاماتتارىمىزدىڭ ءومىرىن وڭ باعىتتا وزگەرتىپ، مەملەكەتىمىز بەن قوعامىمىزدىڭ جاڭا كەلبەتىن قالىپتاستىرۋعا ىقپال ەتەدى»، – دەدى دەپۋتات.
ونىڭ سوزىنشە، جاڭا اتا زاڭنىڭ جوباسى قازاقستاننىڭ تاريحي دامۋ جولىن جان-جاقتى ەسكەرىپ، مەملەكەتتىلىكتىڭ ساباقتاستىعىن ايقىندايدى.
«تاريحشى ءارى مۇراعاتشى رەتىندە مۇنداي ۇستانىم مەن ءۇشىن ايرىقشا قۇندى. ءبىز جاڭا تاعدىردىڭ، ورتاق بولاشاقتىڭ كونستيتۋتسياسىن جاسادىق دەپ شىنايى سەنىممەن ايتا الامىن»، – دەدى ايدوس سارىم.
سونداي-اق ول قۇجاتتا ۇلتتىق قاۋىپسىزدىك، ەل بىرلىگى مەن قوعامدىق كەلىسىمدى ساقتاۋ، قازاقستان شەكاراسىنىڭ مىزعىماستىعىن قامتاماسىز ەتۋ ماسەلەلەرى تولىق قامتىلعانىن اتاپ ءوتتى.
بۇدان بولەك، قازاقستان ءوز كونستيتۋتسياسىندا العاش رەت عىلىم، ءبىلىم، مادەنيەت جانە يننوۆاتسيا سالالارىنىڭ باسىمدىعىن ايقىنداپ وتىر.
ء«بىز الەمدەگى العاشقى مەملەكەتتەردىڭ ءبىرى بولىپ ازاماتتاردىڭ تسيفرلىق قۇقىقتارىن اتا زاڭ دەڭگەيىندە بەكىتىپ وتىرمىز. ءدال وسى سالالاردا مەملەكەتتەر اراسىنداعى باستى باسەكەلەستىك جۇرەدى. ءبىز اشىق، ادال ءارى وركەنيەتتى باسەكەگە دايىنبىز»، – دەدى دەپۋتات.
سونىمەن قاتار، ونىڭ ايتۋىنشا، كونستيتۋتسيا جوباسىندا «زاڭ مەن ءتارتىپ» قاعيداتتارى ۇلتتىق باسىمدىق رەتىندە ايقىندالىپ، قازاقستاندىقتاردىڭ ەل تابيعاتىنىڭ تاعدىرىنا ورتاق ەكولوگيالىق جاۋاپكەرشىلىگى بەكىتىلگەن.
ء«بىزدىڭ كونستيتۋتسيا جوبامىز – بۇل ەركىندىك، ءتارتىپ، زاڭدىلىق جانە ءوزارا جاۋاپكەرشىلىك كونستيتۋتسياسى»، – دەدى ايدوس سارىم.
ءسوز سوڭىندا ول جاڭا كونستيتۋتسيانى ازىرلەۋ بارىسىندا اۋقىمدى ءارى مۇقيات جۇمىس جۇرگىزىلگەنىن اتاپ ءوتتى.
«قازىرگى نۇسقادا ونى پرەزيدەنتكە ۇسىنىپ، جالپىحالىقتىق رەفەرەندۋمعا شىعارۋعا ابدەن بولادى دەپ سەنەمىن. ءبىز رەسپۋبليكالىق شتاب قۇرىپ، ەلىمىزدىڭ بارلىق وڭىرىنە بارىپ، ءاربىر ازاماتپەن اشىق ءارى سەنىمدى ديالوگ جۇرگىزۋگە دايىنبىز»، – دەپ تۇيىندەدى دەپۋتات.
