مەملەكەت باسشىسى الماتى وبلىسىنا جۇمىس ساپارى بارىسىندا وتكەن كەڭەستە قازاقستاندى «شترافستان» نەمەسە «ايىپپۇلستان» دەپ اتايتىن ازاماتتاردى سىنعا الدى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، مۇنداي پىكىرلەردى ەلگە قۇرمەتسىزدىكپەن قارايتىن ادامدار ايتادى. ول ولاردىڭ اراسىندا، وكىنىشكە قاراي، پارلامەنت دەپۋتاتتارى دا بار ەكەنىن اتاپ ءوتتى.
«كەيبىر ادامدار، وكىنىشكە قاراي ولاردىڭ اراسىندا پارلامەنت دەپۋتاتتارى دا بار، ەلىمىزگە دەگەن سۇيىسپەنشىلىگى از بولعاندىقتان نەمەسە وعان مەنسىنبەي قارايتىندىقتان قۇقىقتىق شارالارىمىزدى “شترافستان” نەمەسە “ايىپپۇلستان” دەپ اتايدى. مۇنداي ادامدار ءوز كوزقاراستارىنىڭ تارلىعىن كورسەتە بەرسىن. ال ءبىزدىڭ حالقىمىزعا قوعامدىق ءتارتىپ پەن قاۋىپسىزدىك قاجەت. سوندىقتان ءبىز بۇل باعىتتان اينىمايمىز جانە “زاڭ مەن ءتارتىپ” قاعيداتىن تاباندى تۇردە جۇزەگە اسىرا بەرەمىز. بۇل – ازاماتتارىمىزدىڭ تالابى»، – دەدى قاسىم-جومارت توقاەۆ.
مەملەكەت باسشىسى قوعام مەن ءوڭىر اكىمدەرى قوعامدىق ءتارتىپ پەن زاڭنىڭ ساقتالۋىنا ەرەكشە نازار اۋدارۋى قاجەت ەكەنىن ايتتى.
ەسكە سالايىق، 2024 جىلدىڭ جەلتوقسانىندا ءماجىلىس اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن وزگەرىستەردى ەكىنشى وقىلىمدا قاراعان كەزدە دەپۋتات ازات پەرۋاشەۆ جەكەلەگەن نورمالاردى سىنعا الىپ، قازاقستاندى «شترافستان» دەپ اتاعان ەدى. كەيىنىرەك، 2025 جىلعى 28 قاڭتاردا وتكەن ۇكىمەتتىڭ كەڭەيتىلگەن وتىرىسىندا پرەزيدەنت قۇقىقتىق ءتارتىپتى قامتاماسىز ەتۋ شارالارى ەلگە جاعىمسىز اتاۋ تاعۋعا نەگىز بولماۋى ءتيىس ەكەنىن مالىمدەگەن ەدى. وسىدان كەيىن ازات پەرۋاشەۆ ءوزىنىڭ «شترافستان» ءسوزىن قولدانۋى ءساتسىز تاڭداۋ بولعانىن مويىندادى. ونىڭ ايتۋىنشا، قازاقستاننىڭ حالىقارالىق بەدەلىنە نۇقسان كەلتىرمەۋ ماڭىزدى.
