ازيادا جانە دۇنيەجۇزىلىك كوشپەندىلەر ويىندارى ديرەكتسياسىنىڭ بۇرىنعى باسشىسى نايل نۇروۆ ءىرى كولەمدە پارا الدى دەگەن كۇدىكپەن قاماۋعا الىندى. قازىرگى مالىمەت بويىنشا، ول استاناداعى تەرگەۋ يزولياتورىندا وتىر، دەپ حابارلايدى "ادىرنا".
نايل نۇروۆ قازاقستانداعى بىرنەشە ءىرى سپورتتىق جوبالاردىڭ ۇيىمداستىرعان. اتاپ ايتقاندا، 2011 جىلعى ازيادا، 2017 جىلعى قىسقى ۋنيۆەرسيادا جانە 2024 جىلعى دۇنيەجۇزىلىك كوشپەندىلەر ويىندارىنا دايىندىق جۇمىستارىنا جەتەكشىلىك ەتكەن.
تەرگەۋ دەرەكتەرىنە سايكەس، كوشپەندىلەر ويىندارى اياسىندا قۇنى 500 ميلليون تەڭگەدەن اساتىن ەتنواۋىل سالۋ جوباسى جۇزەگە اسقان. وسى جوباعا بايلانىستى كەلىسىمدەر جاسالعاننان كەيىن مەردىگەرلەردەن جالپى سومانىڭ شامامەن 10 پايىزى كولەمىندە زاڭسىز سىياقى تالاپ ەتىلۋى مۇمكىن ەكەنى ايتىلىپ وتىر. الدىن الا باعالاۋ بويىنشا، الىنعان قاراجات كولەمى كەمىندە 40 ميلليون تەڭگەنى قۇراۋى ىقتيمال.
سونىمەن قاتار تەرگەۋ ماتەريالدارىندا قاراجاتتىڭ ءبىر بولىگى قولما-قول بەرىلگەنى، سونداي-اق مەردىگەر تاراپ كۇدىكتىنىڭ جەكە قاجەتتىلىكتەرىنە قاتىستى كەيبىر شىعىنداردى وتەگەنى جونىندە دەرەكتەر بار.
قازىرگى ۋاقىتتا ءىس بويىنشا تەرگەۋ امالدارى جالعاسۋدا. قۇزىرلى ورگاندار تاراپىنان رەسمي تۇسىنىكتەمە ءالى جاريالانعان جوق.
سوت كۇدىكتىگە قاتىستى ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى.
