10 ماۋسىم كۇنى الماتى قالاسىندا «كىتاپ وقىپ، تۇلعا بولامىن!» جوباسىنىڭ فينالدىق كەزەڭى ۇيىمداستىرىلدى، دەپ حابارلايدى «ادىرنا» ءتىلشىسى.
جوبا اياسىندا قاتىسۋشىلار كىتاپ وقۋ ارقىلى ءبىلىمىن شىڭداپ، تەست تاپسىردى. فينالدىق ءىس-شاراعا بەلگىلى كاسىپكەر، مەتسەنات، SAN Tyres كومپانياسىنىڭ باسشىسى سىرىمبەك تاۋ، قازاقستان رەسپۋبليكاسى مادەنيەت جانە اقپارات مينيسترلىگى ارحيۆ، قۇجاتتاما جانە كىتاپ ءىسى كوميتەتى توراعاسىنىڭ ورىنباسارى روللان قابىلۇلى، سونداي-اق جوبانىڭ ۇيىمداستىرۋشىسى باقداۋلەت دوسمۇحاممەدۇلى قاتىستى.
ۇيىمداستىرۋشىلاردىڭ ايتۋىنشا، «كىتاپ وقىپ، تۇلعا بولام» جوباسى 2021 جىلدان بەرى جۇزەگە اسىپ كەلەدى. 2022 جىلى جوبا اياسىندا 126 مىڭ ادام كىتاپ وقىپ، جەڭىمپاز استانا قالاسىنان ءبىر بولمەلى پاتەر ۇتىپ العان بولاتىن. الايدا كەيىنگى ەكى جىلدا ۋاقىتشا توقتاپ، 2026 جىلدان باستاپ قايتا جانداندى.
جوبانىڭ فورماتى
جوبا ءۇش ايعا جوسپارلانعان. ءار ايدا قاتىسۋشىلار ءبىر كىتاپ وقيدى، كىتاپتار ونلاين تۇردە تەگىن ۇسىنىلادى. اي سوڭىندا 100 سۇراقتان تۇراتىن ونلاين تەست وتكىزىلىپ، 40 ۇپايدان جوعارى ناتيجە كورسەتكەن قاتىسۋشىلار جۇلدەلەرگە يە بولادى. تەستكە بار بولعانى 16 مينۋت بەرىلەدى.
كەزەڭ ناتيجەلەرى
ناۋرىز ايىندا جوبا «دالا دانىشپانى – مايقى بي» كىتابىمەن باستالدى. بۇل كەزەڭدە 52 713 ادام تىركەلىپ، شامامەن 46 مىڭ ادام كىتاپتى وقىدى. 17 مىڭ قاتىسۋشى 40 ۇپايدان جوعارى ناتيجە كورسەتتى.
ءساۋىر ايىندا «تۇندە اتىلعان وق» كىتابى وقىلدى. بۇل كەزەڭدە 26 مىڭ ادام كىتاپتى ونلاين جۇكتەپ العان. 100 ۇپاي جيناعان 19 قاتىسۋشى تىركەلسە، 90+ ۇپايدى 467 ادام، ال 40–90 ارالىعىن 3450 ادام يەلەندى.
مامىر ايىنداعى ءۇشىنشى كەزەڭدە «اتاۋ كەرە» شىعارماسى ۇسىنىلدى. 4071 ادام تەست تاپسىرعان، ونىڭ 1723-ءى 40 ۇپايدان اسقان. 663 قاتىسۋشى 80 ۇپايدان جوعارى ناتيجە كورسەتكەن.
جۇلدە قورى
جوبانىڭ جالپى جۇلدە قورى 35 ميلليون تەڭگەنى قۇرادى. سىياقىلار 10 مىڭ تەڭگەدەن 5 ميلليون تەڭگەگە دەيىنگى ارالىقتا بەرىلىپ، 100-دەن استام جەڭىمپاز ماراپاتتالدى.
فينال ناتيجەلەرى
جوبانىڭ باس جۇلدەسىن قاناتقىزى ءاسيا جەڭىپ الىپ، 2 ميلليون تەڭگە يەلەندى. ال كەنجەتاەۆ نۇرسۇلتان ەكىنشى ورىن (1 ملن تەڭگە), ريناتۇلى سۇلتانالي ءۇشىنشى ورىن (500 مىڭ تەڭگە) يەگەرى اتاندى. سونىمەن قاتار ۇزدىك وندىققا كىرگەن قاتىسۋشىلار دا اقشالاي سىيلىقتارعا يە بولدى.
راندوم ءادىسى ارقىلى دا بىرقاتار قاتىسۋشى ءىرى جۇلدەلەر ۇتىپ الدى. ەڭ ۇلكەن سىيلىق — 5 ميلليون تەڭگە بولاتقىزى نۇرزاداعا بۇيىردى. سونداي-اق 2,5 ميلليون تەڭگە، 1 ميلليون تەڭگە جانە بىرنەشە 100 مىڭ تەڭگەلىك جۇلدەلەر باسقا قاتىسۋشىلارعا تابىستالدى.
