نەگىزگى اكتسيونەرلەرىنىڭ ءبىرى نۇرسۇلتان نازارباەۆ قورى بولىپ سانالاتىن كتك كوممەرتسيالىق تەلەارناسى 2025 قارجى جىلىنىڭ قورىتىندىسى بويىنشا شىعىنعا ۇشىرادى. بۇل تۋرالى اقپارات قارجىلىق ەسەپتىلىك دەپوزيتاريىنىڭ پورتالىندا جاريالانعان اكتسيونەرلەر جينالىسىنىڭ حاتتاماسىندا كورسەتىلگەن, دەپ حابارلايدى "ادىرنا".
2026 جىلعى 28 مامىردا وتكەن اكتسيونەرلەر جينالىسىندا كومپانيانىڭ تەرىس قارجىلىق ناتيجەسىنە بايلانىستى 2025 جىلعى تازا تابىستى بولمەۋ تۋرالى شەشىم قابىلداندى. وسىعان سايكەس، جاي اكتسيالار بويىنشا ديۆيدەندتەر تولەنبەيدى. ايتا كەتەيىك، مۇنداي تولەمدەر سوڭعى بىرنەشە جىل قاتارىنان جۇرگىزىلمەي كەلەدى.
سونداي-اق اكتسيونەرلەر ديرەكتورلار كەڭەسى مۇشەلەرىنە، باس ديرەكتورعا جانە باسقارۋشى قۇرامعا 2025 جىلدىڭ قورىتىندىسى بويىنشا سىياقى تولەمەۋ تۋرالى شەشىم شىعارعان.
دەگەنمەن ارتىقشىلىقتى اكتسيالار يەلەرى تولەم الادى. كومپانيانىڭ وتكەن جىلدارداعى رەزەرۆتەرى ەسەبىنەن ءبىر اكتسياعا 100 تەڭگە مولشەرىندە ديۆيدەند تولەۋ جوسپارلانعان. كتك-دا بارلىعى 500 ارتىقشىلىقتى اكتسيا بار، سوندىقتان تولەمدەردىڭ جالپى كولەمى 50 مىڭ تەڭگەنى قۇرايدى.
اكتسيونەرلەر جينالىسىندا كورپوراتيۆتىك باسقارۋعا قاتىستى بىرقاتار شەشىمدەر دە قابىلداندى. اتاپ ايتقاندا، 2026–2028 جىلدار ارالىعىنداعى قارجىلىق ەسەپتىلىككە اۋديت جۇرگىزۋ قۇقىعى «Kaz Audit Finance» جشس-نە بەرىلدى. سونىمەن قاتار ەسەپ كوميسسياسىنىڭ قۇرامى جاڭارتىلىپ، ونىڭ قاتارىنا ءۇش جاڭا مامان ەنگىزىلدى.
Egov دەرەكتەرىنە سايكەس، كتك قۇرىلتايشىلارىنىڭ سانى 105-كە جەتەدى.
ايتا كەتۋ كەرەك، 2025 جىلعى قارجىلىق ەسەپتىلىك ازىرگە جاريالانعان جوق. الايدا 2024 جىلى تەلەارنا پايدامەن جۇمىس ىستەگەن. سول جىلى كومپانيانىڭ تازا تابىسى 67,4 ملن تەڭگەنى قۇراسا، 2023 جىلى بۇل كورسەتكىش 64,9 ملن تەڭگە بولعان.
2024 جىلدىڭ قورىتىندىسى بويىنشا كتك-نىڭ تاۋارلار مەن قىزمەتتەردى وتكىزۋدەن تۇسكەن تابىسى 5,7 ملرد تەڭگەگە جەتكەن. قىزمەتتەردىڭ وزىندىك قۇنى 4,7 ملرد تەڭگەنى قۇراعاندىقتان، جالپى تابىس كولەمى 970,2 ملن تەڭگەگە جەتتى. ال سالىق سالىنعانعا دەيىنگى پايدا 94,9 ملن تەڭگە بولعان.
ايتا كەتسەك، نۇرسۇلتان نازارباەۆ قورى 2000 جىلى قۇرىلعان. قور جاستاردى، ءبىلىم مەن عىلىمدى، مادەنيەت پەن الەۋمەتتىك باستامالاردى قولداۋعا باعىتتالعان ءتۇرلى جوبالاردى جۇزەگە اسىرادى.
