جاس كاسىپكەر ءابدىنۇر جامبىل 17 جاسىندا قاراعاندى قالاسىندا جەكە كونديتەرلىك تسەحىن اشىپ، كوپشىلىككە ۇلگى بولارلىق جەتىستىككە قول جەتكىزدى. ونىڭ كاسىپكەرلىك جولى پاندەميا كەزىندە باستالعان، دەپ حابارلايدى “ادىرنا”.
ءابدىنۇر 13 جاسىندا YouTube پلاتفورماسىنداعى بەينەساباقتار ارقىلى تورت ازىرلەۋدى ۇيرەنە باستايدى. قىزىعۋشىلىق رەتىندە باستالعان ءىس ۋاقىت وتە كەلە تابىس كوزىنە اينالىپ، 15 جاسىندا ول ءوز ونىمدەرىن ساتۋدى قولعا العان. العاشقى بەنتو-تورتتارىن اعاسىنىڭ گۇل دۇكەنى ارقىلى وتكىزىپ، كاسىپكەرلىكتىڭ قىر-سىرىن مەڭگەرەدى.
جاس كونديتەر بيزنەستى دامىتۋ ماقساتىندا باستاپقىدا جوعارى وقۋ ورنىنا تۇسۋدەن باس تارتىپ، بار كۇش-جىگەرىن ءوز ىسىنە جۇمساعان. كەيىن كوشەدە كەلە جاتىپ كەزدەيسوق جالعا بەرىلەتىن عيماراتتى كورىپ، بولاشاق تسەحتىڭ ورنىن تاپقان.
كونديتەرلىك تسەحتى اشۋعا 4 ميلليون تەڭگەدەن استام قاراجات جۇمسالعان. ونىڭ جارتىسىن ءابدىنۇر ءوزى جيناسا، قالعان بولىگى اتا-اناسىنىڭ اتىنا راسىمدەلگەن نەسيە ارقىلى الىنعان. نەسيە تولەمدەرىن دە جاس كاسىپكەر ءوز تابىسىنان وتەگەن.
العاشقى كەزەڭدە ءابدىنۇر بارلىق جۇمىستى ءوزى اتقارعان. ول تسەحتى تازالاپ، ءتاتتى ونىمدەر دايىنداپ، بيزنەستى جارنامالاۋمەن دە اينالىسقان. كەيىن قىزمەتكەرلەر قابىلداعانىمەن، تۋىستارى مەن دوستارىنان قۇرالعان العاشقى كوماندا كۇتكەن ناتيجەنى بەرمەگەن. وسىدان كەيىن كاسىبي مامانداردى جۇمىسقا الىپ، ۇجىمداعى ءتارتىپ پەن جاۋاپكەرشىلىكتى كۇشەيتكەن.
كاسىپ بارىسىندا قيىندىقتار دا كەزدەسكەن. سەرىكتەستەرىنىڭ ءبىرى شامامەن 900 دانا شوكولادقا باتىرىلعان قۇلپىناي مەن 50 بەنتو-تورتقا تاپسىرىس بەرىپ، تولەم جاساماعان. وسى وقيعادان كەيىن كاسىپكەر بارلىق تاپسىرىسقا الدىن الا تولەم جاساۋ ءتارتىبىن ەنگىزگەن.
قازىرگى تاڭدا ءابدىنۇر ۋنيۆەرسيتەتتە ەكونوميست-بۋحگالتەر ماماندىعى بويىنشا ءبىلىم الىپ ءجۇر. ونىڭ كومانداسىندا 9 قىزمەتكەر جۇمىس ىستەيدى. ال كونديتەرلىك ونىمدەرىنىڭ ىشىندە ەڭ قىمبات تورتتىڭ باعاسى 290 مىڭ تەڭگەنى قۇرايدى.
ءابدىنۇر جامبىلدىڭ وقيعاسى ەڭبەكقورلىق پەن تاباندىلىقتىڭ ارقاسىندا جاس كەزدەن-اق ۇلكەن جەتىستىكتەرگە جەتۋگە بولاتىنىن كورسەتەدى.
