«جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق ترانسفورماتسيا ارقىلى شەشۋ» اتتى جولداۋىندا پرەزيدەنت قاسىم-جومارت توقاەۆ ەلدىڭ ترانزيتتىك الەۋەتىن كۇشەيتىپ، ونى ەۋرازياداعى جەتەكشى اۋە حابىنا اينالدىرۋدى تاپسىردى. قاراعاندى وبلىسىندا بۇل مىندەتتىڭ قالاي ورىندالىپ جاتقانى وبلىس اكىمدىگىندە وتكەن جيىندا ايتىلدى.
وڭىردە ەلەكتروندىق كوممەرتسياعا ارنالعان Teez ساۋدا-لوگيستيكالىق قويماسى ىسكە قوسىلدى. ونىڭ قۋاتى جىلىنا 27 ميلليونعا دەيىن تاپسىرىستى وڭدەۋگە مۇمكىندىك بەرەدى. بۇل شاعىن جانە ورتا بيزنەستىڭ دامۋىنا سەرپىن بەرمەك. سونىمەن قاتار سارىارقا اۋەجايى جاڭعىرتىلىپ، وندا مۋلتيمودالدى اەروحاب – CargoHUB Karaganda قۇرىلۋدا. وسى ماقساتقا 354 گەكتار جەر ءبولىنىپ، كىرمە تەمىرجول جولى جوبالانۋدا جانە كولەمى 6 مىڭ تەكشە مەتر بولاتىن جانارماي قۇيۋ كەشەنى سالىنىپ جاتىر.
وبلىس اكىمىنىڭ ءبىرىنشى ورىنباسارى ازامات تايجانوۆتىڭ ايتۋىنشا، وڭىردەگى كولىك جوبالارى جۇيەلى سيپات الۋدا.
– پرەزيدەنتتىڭ تاپسىرماسىنا سايكەس، CargoHUB Karaganda مۋلتيمودالدى اەروحابىن جانە سارىارقا اۋەجايى اۋماعىندا اەا-نىڭ سۋبايماعىن قۇرۋ ماسەلەسى پىسىقتالۋدا. بۇل نىسان بولاشاقتا ورتالىق قازاقستان عانا ەمەس، ونىڭ اۋماعىنان تىس حالىقارالىق جۇك تاسىمالىنىڭ نەگىزگى ورتالىعىنا اينالادى. جاڭا جانارماي قۇيۋ كەشەنىنىڭ قۇرىلىسى باستالدى. دوستىق – مويىنتى تەمىرجول ۋچاسكەسىندە قوس جولدىڭ قۇرىلىسى اياقتالۋعا جاقىن. بالقاش اۋەجايى جاڭعىرتىلۋدا. مۇنىڭ ءبارى ءوڭىردىڭ ترانزيتتىك الەۋەتىن كۇشەيتەدى، – دەدى وبلىس اكىمىنىڭ ورىنباسارى.
2030 جىلعا قاراي قاراعاندى اۋەجايى ارقىلى وتەتىن جۇك كولەمى جىلىنا 15 مىڭ توننادان 200 مىڭ تونناعا دەيىن ۇلعايماق. بۇل شامامەن 2 مىڭ جاڭا جۇمىس ورنىن اشىپ، بيۋدجەتكە قوسىمشا كىرىس اكەلەدى.
– جول جەلىسى اۋقىمدى تۇردە جاڭارتىلۋدا: رەسپۋبليكالىق ماڭىزى بار تراسسالاردان باستاپ قالالىق جانە اۋىلدىق جولدارعا دەيىنگى ۋچاسكەلەر قامتىلىپ وتىر. بۇل كولىكتىك قولجەتىمدىلىكتى ارتتىرىپ، حالىق پەن بيزنەس ءۇشىن جاڭا مۇمكىندىكتەر جاسايدى، – دەدى ەرماعانبەت بولەكپاەۆ.
