بۇگىن «تازا قازاقستان» تۇجىرىمداماسى مەن «ادال ازامات» ءبىرتۇتاس تاربيە باعدارلاماسى اياسىندا وڭىرىمىزدە مىڭداعان وقۋشى مەن پەداگوگتى بىرىكتىرگەن اۋقىمدى ەكولوگيالىق باستاما جۇزەگە اسىرىلدى.
بيىلعى اكتسيا ەرەكشە جوعارى دەڭگەيدە ءوتتى. قاراعاندى وبلىسى بويىنشا وعان 11-سىنىپتىڭ 8 758 تۇلەگى قاتىسسا، ونىڭ 3 530-ى — قاراعاندى قالاسىنىڭ مەكتەپ بىتىرۋشىلەرى. ءىس-شارا بارىسىندا وڭىردە شامامەن 350–400 اعاش وتىرعىزىلدى، ونىڭ ىشىندە 140–150-گە جۋىعى وبلىس ورتالىعىندا ەگىلدى.
اكتسيانىڭ باستى ماقساتى — وسكەلەڭ ۇرپاقتىڭ قورشاعان ورتاعا دەگەن جاۋاپكەرشىلىگىن قالىپتاستىرۋ، ەكولوگيالىق مادەنيەتتى دامىتۋ جانە تۋعان ولكەنى كوگالداندىرۋعا ۇلەس قوسۋ. قالاداعى ءبىلىم بەرۋ ۇيىمدارى باستامانى بەلسەندى قولداپ، تۇلەكتەر ومىرلەرىندەگى ماڭىزدى كەزەڭدى ايشىقتايتىن «ەستەلىك اعاشتارىن» وتىرعىزدى.
ەرەكشە نازار باۋىرجان مومىشۇلى اتىنداعى مەكتەپ بازاسىندا وتكەن اكتسياعا اۋدى. مۇندا ەكولوگيالىق ءداستۇر 30 جىلدان استام ۋاقىتتان بەرى جالعاسىپ كەلەدى جانە مەكتەپ ءومىرىنىڭ اجىراماس بولىگىنە اينالعان. وقۋ ورنى اۋماعىندا «تۇلەكتەر اللەياسى» قالىپتاسىپ، سونىڭ ارقاسىندا مەكتەپ اينالاسى شاعىن ساياباققا ۇقساس جاسىل ايماققا اينالعان.
بيىل مەكتەپتىڭ 78 تۇلەگى 40-تان استام اعاش وتىرعىزدى، ولاردىڭ قاتارىندا شىرشا، قايىڭ جانە جەمىس اعاشتارى بار. سونىمەن قاتار اۋماققا 50 ءتۇپ قازتاماق گۇلى ەگىلدى. الداعى ۋاقىتتا «تازا قازاقستان» اكتسياسى اياسىندا مۇندا تاعى 1000-عا جۋىق گۇل وتىرعىزىلىپ، ەتنوگۇلزار جاساۋ جوسپارلانۋدا.
ەكولوگيالىق باستاما قالانىڭ باسقا دا مەكتەپتەرىندە جالعاسىن تاپتى. جالپى العاندا اكتسياعا 3 500-دەن استام وقۋشى قاتىسىپ، جاستاردىڭ بەلسەندىلىگى مەن مۇنداي ءىس-شارالاردىڭ ماڭىزدىلىعىن كورسەتتى.
وسىنداي باستامالار تەك ەكولوگيالىق جاعدايدى جاقسارتۋعا عانا ەمەس، سونىمەن قاتار جاستاردىڭ تابيعاتقا ۇقىپتى قاراۋىن قالىپتاستىرىپ، جاۋاپكەرشىلىك پەن جاسامپازدىق قۇندىلىقتارىن نىعايتۋعا ىقپال ەتەدى.
