پاۆلودار وبلىسىنداعى ب. احمەتوۆ اتىنداعى جوعارى پەداگوگيكالىق كوللەدجدىڭ وقىتۋشىسى گۇلميرا مەشىتباەۆا حالىقارالىق دەڭگەيدەگى بەدەلدى ماراپاتقا يە بولدى. ول ETF New Learning Award 2026 بايقاۋى اياسىندا تابىستالاتىن INSPIRATION AWARD سىيلىعىنىڭ لاۋرەاتى اتاندى.
بايقاۋعا قاتىسۋشى پەداگوگ بولاشاق باستاۋىش سىنىپ مۇعالىمدەرىن دايارلاۋ بارىسىندا قولدانىلاتىن SCAFFOLD-كارتالار ادىسىنە نەگىزدەلگەن يننوۆاتسيالىق تاجىريبەسىن ۇسىندى. بۇل ءتاسىل ستۋدەنتتەردىڭ شىعارماشىلىق جانە تسيفرلىق داعدىلارىن دامىتۋعا باعىتتالعان.
جوبا اياسىندا ستۋدەنتتەر ءبىلىم بەرۋ ماقساتىنداعى ءتۇرلى پلاتفورمالار مەن سايتتار ازىرلەپ، ولاردى بەينەماتەريالدار جانە ينتەراكتيۆتى تاپسىرمالارمەن تولىقتىرادى. مۇنداي رەسۋرستاردى مەكتەپ وقۋشىلارى، مۇعالىمدەر مەن اتا-انالار پايدالانا الادى.
گۇلميرا مەشىتباەۆانىڭ جۇمىسى حالىقارالىق ساراپشىلار تاراپىنان جوعارى باعالانىپ، پەداگوگ ءوز تاجىريبەسىن تانىستىرۋ ءۇشىن بەلگيانىڭ بريۋسسەل قالاسىندا وتەتىن حالىقارالىق كونفەرەنتسياعا شاقىرتۋ الدى.
بۇل جەتىستىك قازاقستاندىق پەداگوگتەردىڭ حالىقارالىق ءبىلىم بەرۋ كەڭىستىگىندەگى الەۋەتىن تاعى ءبىر مارتە دالەلدەپ، وتاندىق ءبىلىم بەرۋ سالاسىنىڭ دامۋىنا قوسىلعان ماڭىزدى ۇلەس رەتىندە باعالانۋدا.
