2026 جىلعى 11 قىركۇيەكتە وزبەكستان پرەزيدەنتى شاۆكات ميرزيوەۆ بالالارعا زورلىق-زومبىلىق كورسەتكەن پەداگوگتەرگە قاتىستى جەكە اكىمشىلىك جاۋاپكەرشىلىك ەنگىزەتىن زاڭعا قول قويدى. بۇل تۋرالى ەلدىڭ ادىلەت مينيسترلىگى حابارلادى، دەپ جازادى “ادىرنا”.
قۇجات مەكتەپ وقۋشىلارىن مۇعالىمدەردىڭ ۇرىپ-سوعۋىنا قاتىستى بىرقاتار جانجالدان كەيىن قابىلداندى.
شاۆكات ميرزيوەۆ قول قويعان №Ўرق-1174 زاڭ اكىمشىلىك جاۋاپكەرشىلىك تۋرالى كودەكسكە وزگەرىستەر ەنگىزەدى. جاڭا نورماعا سايكەس، كامەلەتكە تولماعانداردى تاربيەلەۋ جانە وقىتۋعا جاۋاپتى ءبىلىم بەرۋ ۇيىمىنىڭ قىزمەتكەرى بالاعا كۇش قولدانسا، ونى قورلاسا، كەمىتسە نەمەسە بۋللينگكە ۇشىراتسا، وعان 1-دەن 5 بازالىق ەسەپتىك شاماعا دەيىن، ياعني 440 مىڭنان 2,2 ميلليون سۋمعا دەيىن (شامامەن 34–170 دوللار) ايىپپۇل سالىنادى.
الايدا بۇل جازا پەداگوگتىڭ ارەكەتى بۇدان دا اۋىر قۇقىقبۇزۋشىلىق قۇرامىن قامتىماعان جاعدايدا عانا قولدانىلادى. ەگەر بالا دەنساۋلىعىنا زيان كەلتىرىلسە، ۇرىپ-سوعۋ، ازاپتاۋ نەمەسە قورقىتۋ فاكتىلەرى انىقتالسا، ءىس نەعۇرلىم قاتاڭ جاۋاپكەرشىلىك قاراستىرىلعان باپ بويىنشا قارالادى.
سونىمەن قاتار زاڭ پەداگوگ ماماندىعىنا قاتىستى شەكتەۋ ەنگىزەدى. كامەلەتكە تولماعاندارعا فيزيكالىق نەمەسە پسيحولوگيالىق زورلىق كورسەتكەنى ءۇشىن اكىمشىلىك جاۋاپكەرشىلىككە تارتىلعان پەداگوگتەر ءبىر جىل مەرزىمگە پەداگوگيكالىق قىزمەتتەن شەتتەتىلەدى.
بۇل شەكتەۋ بالاباقشالاردا، مەكتەپتەردە، ورتا ارناۋلى جانە كاسىپتىك ءبىلىم بەرۋ ۇيىمدارىندا، سونداي-اق بالالارعا ارنالعان قوسىمشا ءبىلىم بەرۋ مەكەمەلەرىندە جۇمىس ىستەيتىن پەداگوگتەرگە قاتىستى بولادى.
قۇجات ۇلتتىق الەۋمەتتىك قورعاۋ اگەنتتىگى ازىرلەگەن التى كودەكس پەن ون ءۇش زاڭعا وزگەرىس ەنگىزۋدى كوزدەيتىن اۋقىمدى تۇزەتۋلەر پاكەتىنىڭ ءبىر بولىگى بولدى. «گازەتا.uz» باسىلىمىنىڭ جازۋىنشا، سەنات پەداگوگتەردى ءبىر جىلعا قىزمەتتەن شەتتەتۋ تۋرالى نورمانى ماقۇلداعان. اگەنتتىك ديرەكتورىنىڭ ورىنباسارى سيروجيددين ابدۋللاەۆ مۇعالىمنىڭ ارەكەتىن باعالاۋ كەزىندە سوت «بالالاردى زورلىق-زومبىلىقتىڭ بارلىق تۇرىنەن قورعاۋ تۋرالى» زاڭعا سۇيەنەتىنىن تۇسىندىرگەن. اتالعان زاڭدا پسيحولوگيالىق زورلىق-زومبىلىققا قورلاۋ، جالا جابۋ، قوقان-لوقى كورسەتۋ، ار-نامىس پەن قادىر-قاسيەتتى كەمسىتۋ، مازاق ەتۋ جانە بۋللينگ جاتادى.
وزبەكستان مەكتەپتەرىندەگى مۇعالىمدەردىڭ وقۋشىلارعا قول كوتەرۋى ماسەلەسى مامىر ايىندا تاشكەنتتەگى №275 مەكتەپتە بولعان وقيعادان كەيىن قىزا ءتۇستى. الەۋمەتتىك جەلىلەردە ينفورماتيكا ءپانىنىڭ مۇعالىمى توعىزىنشى سىنىپ وقۋشىسىن ۇرىپ جاتقان ۆيدەو تاراعان. پەداگوگكە دەنە جاراقاتىن كەلتىرۋ بابى بويىنشا قىلمىستىق ءىس قوزعالعانىمەن، بىرنەشە كۇننەن كەيىن ءىس توقتاتىلدى. تەرگەۋ نۇسقاسى بويىنشا، مۇعالىم سىنىپتاعى ءتارتىپتى قامتاماسىز ەتۋ ماقساتىندا ارەكەت ەتكەن.
