فرانتسيانىڭ ەۆيان-لە-بەن قالاسىندا وتكەن سامميتتە «ۇلكەن جەتىلىك» (G7) ەلدەرى رەسەيدىڭ مۇناي جانە گاز سەكتورىنا قارسى جاڭا سانكتسيالار ەنگىزۋ تۋرالى كەلىسىمگە كەلدى، دەپ حابارلايدى «ادىرنا» ءتىلشىسى DW باسىلىمىنا سىلتەمە جاساپ.
بۇل تۋرالى 17 ماۋسىمعا قاراعان ءتۇنى جاريالانعان G7 كوشباسشىلارىنىڭ قورىتىندى مالىمدەمەسىندە ايتىلعان.
ء«بىز رەسەيدىڭ اسكەري ەكونوميكاسىنا قارسى قىسىمدى كۇشەيتۋگە مىندەتتەنەمىز. وسىعان بايلانىستى مۇناي-گاز سەكتورىنا قاتىستى شارالاردى قوسا العاندا، سانكتسيالارىمىزدى كۇشەيتەمىز»، – دەلىنگەن قۇجاتتا.
مالىمدەمەدە قازىرگى ۋاقىتتا ماسكەۋگە قارسى جاڭا شەكتەۋلەر ەنگىزۋدىڭ قولايلى كەزەڭى تۋعانى اتاپ وتىلگەن. سەبەبى اقش پرەزيدەنتى دونالد ترامپ يرانمەن ورمۇز بۇعازىن اشۋ جونىندە كەلىسىمگە قول جەتكىزگەن. الەمدىك مۇناي مەن گازدىڭ ەداۋىر بولىگى ءدال وسى تەڭىز ءدالىزى ارقىلى تاسىمالدانادى.
سونداي-اق G7 ەلدەرى ۋكراينانىڭ بوستاندىعىن، ەگەمەندىگى مەن اۋماقتىق تۇتاستىعىن قورعاۋداعى كۇرەسىن قولداۋدا ءبىرتۇتاس ەكەنىن مالىمدەدى.
ء«بىز ماڭىزدى ينفراقۇرىلىم نىساندارى مەن مادەني مۇرا وبەكتىلەرىنە جاسالعان شابۋىلداردان زارداپ شەگىپ وتىرعان ۋكراينا حالقىمەن ىنتىماقتاستىعىمىزدى تاعى دا راستايمىز. ۋكراينانىڭ تاباندىلىعىن جانە سوڭعى ايلاردا مايداندا قول جەتكىزگەن جەتىستىكتەرىن جوعارى باعالايمىز. قازىرگى ۋاقىتتا جاعدايدىڭ جاڭا سەرپىن العانىن اتاپ وتەمىز»، – دەلىنگەن مالىمدەمەدە.
وسى سەرپىندى قولداۋ جانە كۇشەيتۋ ماقساتىندا G7 كوشباسشىلارى ۋكرايناعا اۋە قورعانىسى جۇيەلەرىن، زىمىراندارعا قارسى توسقاۋىل قويۋ قۇرالدارىن، الىس قاشىقتىققا ارنالعان قارۋ-جاراق پەن وزگە دە اسكەري تەحنيكانى جەتكىزۋدى ارتتىرۋعا كەلىستى.
سونىمەن قاتار ولار ۋكراينا اۋماعىندا اسكەري ءونىم ءوندىرىسىن ۇلعايتۋعا مۇمكىندىك بەرەتىن ليتسەنزيالار بەرۋ ماسەلەسىن قاراستىرۋعا ۋاعدالاستى.
G7 ەلدەرى ۋكرايناعا الداعى قىس مەزگىلىنەن وتۋگە كومەكتەسۋ ءۇشىن ەنەرگەتيكا سالاسىنداعى قولداۋدى دا جالعاستىرۋعا ۋادە بەردى.
«ۇلكەن جەتىلىك» قۇرامىنا گەرمانيا، اقش، ۇلىبريتانيا، فرانتسيا، يتاليا، جاپونيا جانە كانادا كىرەدى.
ەسكە سالايىق، بىرنەشە كۇن بۇرىن دونالد ترامپ رەسەي پرەزيدەنتى ۆلاديمير پۋتينمەن جانە ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەسكەن بولاتىن. اق ءۇي باسشىسى ۋكرايناداعى سوعىس قيمىلدارىن توقتاتۋ قاجەتتىگىن تاعى دا ايتىپ، بۇل باعىتتا ەۋروپاداعى سەرىكتەستەرىنە دە، كيەۆكە دە ىقپال ەتۋگە دايىن ەكەنىن مالىمدەگەن ەدى.
