ساۋدا جانە ينتەگراتسيا ءمينيسترى ارمان شاققاليەۆ ەلىمىزدەگى قوي ەتى باعاسىنىڭ ءوسۋىن بانكەتتەر مەن مەرەكەلىك ءىس-شارالار كەزىندەگى سۇرانىستىڭ ارتۋىمەن ءتۇسىندىردى، دەپ حابارلايدى «ادىرنا» ءتىلشىسى.
ول باعانىڭ قىمباتتاۋى ماۋسىمدىق سۇرانىسپەن بايلانىستى بولاتىنىن جەتكىزدى.
«قوي ەتى بويىنشا باعانىڭ نەگىزگى شارىقتاۋ فاكتورى — قۇربان ايت بولدى. 8 ناۋرىزدا گۇل باعاسى ءاردايىم وسەدى، پاسحا كەزىندە جۇمىرتقا قىمباتتايدى. سوندىقتان مۇندا نەگىزگى ماسەلە — سۇرانىس پەن ۇسىنىس. سۇرانىس ارتقان كەزدە باعا وسەدى. بۇل – ەكونوميكانىڭ زاڭى، ەكونوميكا وسىلاي جۇمىس ىستەيدى. سوندىقتان بۇعان تاڭدانۋدىڭ قاجەتى جوق»، — دەدى مينيستر بۇگىن ءماجىلىس كۋلۋارىندا.
شاققاليەۆ تۇتىنۋشىلار ءۇشىن قوي ەتىنە بالاما بار ەكەنىن اتاپ ءوتتى.
«تۇتىنۋشىلار ءۇشىن ارقاشان تاڭداۋ بار. قوي ەتىنەن بولەك، نارىقتا سيىر ەتى، قۇس ەتى جانە جىلقى ەتى ۇسىنىلادى. سوندىقتان باعانى تالداعاندا تەك ءبىر ءونىمنىڭ قۇنىن ەمەس، حالىقتىڭ تۇتىنۋ ۇلگىسىن، سۇرانىس ەرەكشەلىگىن جانە ماۋسىمدىق فاكتورلاردى دا ەسكەرۋ كەرەك. باعا ەشقاشان ءبىر دەڭگەيدە تۇرمايدى. ادەتتە تۇراقتىلىق سۇرانىستى قاناعاتتاندىراتىن ۇسىنىس جەتكىلىكتى بولعان كەزدە قالىپتاسادى»،– دەدى ول.
بۇعان دەيىن جىل باسىنان بەرى قازاقستاندا 30-دان استام الەۋمەتتىك ماڭىزى بار ازىق-تۇلىك تاۋارىنىڭ باعاسى 1,5%-عا وسكەنى بەلگىلى بولعان ەدى. سونىمەن قاتار ەل سيىر ەتى باعاسى ەڭ تومەن مەملەكەتتەردىڭ قاتارىندا ەكەنى ايتىلعان.
