سىرتقى ىستەر ءمينيسترى ەرمەك كوشەرباەۆ اقش-تا ۇستالعان قازاقستان ازاماتى ەلامان بالتاگەرەيگە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، قازاقستان تاراپى قولدانىستاعى زاڭناما اياسىندا ازاماتقا قاجەتتى كونسۋلدىق قولداۋ كورسەتۋگە دايىن، الايدا شەتەلدەگى تەرگەۋ جۇمىستارىنا ارالاسۋعا قۇقىعى جوق.
ء«بىز زاڭنامادا كوزدەلگەن شەڭبەردە كومەك كورسەتەمىز. تەرگەۋ ارەكەتتەرىنە ارالاسۋعا قۇقىعىمىز جوق. قازىر ونىڭ كەپىلمەن بوساتىلعانىن بىلەمىز. بۇل بەلگىلى ءبىر دەڭگەيدە ءۇمىت ۇيالاتۋى مۇمكىن»، – دەدى ەرمەك كوشەرباەۆ.
ءسىم قازاقستان ازاماتىنىڭ ءوز قۇقىقتارىن قورعاۋ ءۇشىن ادۆوكات جالداۋعا مۇمكىندىگى بار ەكەنىن اتاپ ءوتتى.
بۇعان دەيىن اقش-تىڭ كوشى-قون جانە كەدەندىك باقىلاۋ قىزمەتى ەلامان بالتاگەرەيدىڭ ەل اۋماعىندا زاڭسىز جۇرگەنىن حابارلاعان بولاتىن. مەكەمە مالىمەتىنشە، كوشى-قون سوتى 2025 جىلدىڭ جازىندا ونى اقش-تان شىعارۋ تۋرالى شەشىم قابىلداعان، الايدا ول سوت وتىرىسىنا كەلمەگەن. اقش تاراپى قازاقستاندىقتى تەرروريزمگە قاتىسى بولۋى مۇمكىن نەمەسە وسىنداي كۇدىككە ىلىنگەن تۇلعا رەتىندە ۇستاعانى بەلگىلى بولدى. قازىرگى ۋاقىتتا ەلامان بالتاگەرەي كەپىلمەن بوساتىلعان، ال ءىس بويىنشا قۇقىقتىق راسىمدەر جالعاسىپ جاتىر.
