يراندا جەرگىلىكتى ءانشى مەن ونىڭ شىعارماشىلىق توبىنىڭ سەگىز مۇشەسى سوت شەشىمىمەن 74 دۇرە سوعۋ جازاسىنا كەسىلدى، دەپ حابارلايدى "ادىرنا" ۇلتتىق پورتالى.
مۇنداي ۇكىم ولاردىڭ ينتەرنەتتە جاريالانعان مۋزىكالىق قويىلىمىنان كەيىن شىققان.
بيلىك وكىلدەرىنىڭ مالىمەتىنشە، 29 جاستاعى ءانشى YouTube پلاتفورماسىندا جاريالانعان بەينەجازبادا حيدجاب كيمەي ونەر كورسەتكەن. كونتسەرت بارىسىندا ول پاتريوتتىق ءان ورىنداپ، ۆيدەو الەۋمەتتىك جەلىلەردە كەڭىنەن تارالعان. وقيعادان كەيىن ءانشى مەن مۋزىكانتتار قۇقىق قورعاۋ ورگاندارىنىڭ قولىنا ءتۇسىپ، كەيىن بوساتىلعان. الايدا اراعا ۋاقىت سالىپ، ولارعا قاتىستى قىلمىستىق ءىس قوزعالىپ، سوت پروتسەسى باستالدى.
كۋم پروۆينتسياسىنىڭ سوتى ارتىستەردى قوعامدىق مورال تالاپتارىن بۇزدى دەپ تانىپ، 74 دۇرە سوعۋ جازاسىنان بولەك، ەكى جىل بويى ەلدەن شىعۋعا جانە شىعارماشىلىق قىزمەتپەن اينالىسۋعا تىيىم سالدى. سونىمەن قاتار ولارعا ينتەرنەت ارقىلى ادەپ نورمالارىنا قايشى كەلەتىن ماتەريال تاراتتى دەگەن ايىپ تاعىلعان.
بۇل ءىس يرانداعى ونەر ادامدارىنا قويىلاتىن تالاپتار مەن كيىم ۇلگىسىنە قاتىستى قاتاڭ ەرەجەلەردىڭ قوعام نازارىن تاعى ءبىر مارتە اۋدارتتى.
