ايبەك ورالباي قىتايدا ءوتىپ جاتقان الەم كۋبوگىنىڭ جارتىلاي فينالىندا برازيليالىق دجوەل راموستى جەڭىپ، ءتۋرنيردىڭ فينالىنا شىقتى، دەپ حابارلايدى "ادىرنا" ۇلتتىق پورتالى.
90 كەلىدەن جوعارى سالماق دارەجەسىندە وتكەن كەزدەسۋ ءۇش راۋندقا سوزىلدى. العاشقى راۋندتا تورەشىلەر باسىمدىقتى برازيليالىق سپورتشىعا بەرگەنىمەن، كەيىن ايبەك ورالباي جەكپە-جەك بارىسىن ءوز پايداسىنا وزگەرتتى.
شەشۋشى ءۇشىنشى راۋندتا قازاقستاندىق بىلعارى قولعاپ شەبەرى قارسىلاسىن نوكداۋنعا جىبەرىپ، جەڭىسىن ناقتىلاي ءتۇستى. ناتيجەسىندە تورەشىلەر شەشىمىمەن ايبەك ورالباي 3:2 ەسەبىمەن جەڭىسكە جەتتى.
قازاقستاندىق بوكسشى الەم كۋبوگىنىڭ فينالىنا جولداما الىپ، التىن مەدال ءۇشىن سىنعا تۇسەتىن بولدى.
ۇقساس جاڭالىقتار
