اقش-تا تۇراتىن قازاقستاندىق ايەلدىڭ ۇيىندە جۇمىس ىستەگەن بالا كۇتۋشىگە قاتىستى كامەلەتكە تولماعان بالاعا كۇش قولداندى دەگەن ايىپتاۋلار الەۋمەتتىك جەلىدە جاريالاندى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
جەلى قولدانۋشىسى مارگاريتا ءيمانالىنىڭ مالىمەتىنشە، ونىڭ قۇربىسى نەۆادا شتاتىندا قازاقستان ازاماتىن بالا كۇتۋشى رەتىندە جۇمىسقا قابىلداعان. ايتۋىنشا، جۇمىسقا ورنالاسار الدىندا ايەل بارلىق قاجەتتى انىقتامالار مەن ۇسىنىم حاتتارىن ۇسىنعان.
الايدا ءبىر كۇنى جۇمىس بەرۋشىگە قىزىنىڭ قۇلاپ جاراقات العانى تۋرالى حابارلانعان. وسىدان كەيىن ول ۇيدەگى بەينەباقىلاۋ كامەرالارىنىڭ جازبالارىن قاراپ، وندا ءبىر جاسار بالاعا قاتىستى قاتىگەزدىك سيپاتىنداعى ارەكەتتەر بەينەلەنگەنىن مالىمدەدى. اۆتور جازباسىنا بەينەجازبانى دا تىركەگەن. ونىڭ سوزىنشە، وقيعادان كەيىن بالا كۇتۋشى بىردەن جۇمىستان شىعارىلعان. سونىمەن قاتار ول اتالعان ازاماتشانىڭ قازاقستانعا ورالۋى مۇمكىن ەكەنىن ايتىپ، تۇرعىنداردى ساق بولۋعا شاقىردى.
الەۋمەتتىك جەلىدە پىكىر بىلدىرگەن تاعى ءبىر قولدانۋشى دا بۇل ايەلدىڭ ءوز ۇيىندە بالا كۇتۋشى بولىپ جۇمىس ىستەگەنىن مالىمدەدى. ونىڭ ايتۋىنشا، قىزمەتكەر باستاپقىدا جاقسى ۇسىنىمدارمەن كەلگەنىمەن، كەيىن بۇرىنعى جۇمىس بەرۋشىلەردەن جاعىمسىز پىكىرلەر العانى بەلگىلى بولعان.
سونداي-اق ول بالا كۇتۋشىنىڭ اگرەسسيۆتى مىنەز كورسەتكەنىن، باسقا كۇتۋشىلەرمەن جانە اتا-انالارمەن جانجالدارعا ءجيى ارالاسقانىن، بالانى قولىنان ءتۇسىرىپ العان جاعداي بولعانىن جانە ۇيدەن اقشا مەن كەيبىر زاتتاردىڭ جوعالعانىن بايقاعانىن العا تارتتى.
جاريالانعان اقپاراتقا قاتىستى اقش قۇقىق قورعاۋ ورگاندارىنىڭ رەسمي تۇسىنىكتەمەسى نەمەسە سوت شەشىمى ازىرگە جاريالانعان جوق. سونىمەن قاتار بالا كۇتۋشىگە تاعىلعان ايىپتاۋلار بويىنشا ونىڭ ۇستانىمى بەلگىسىز.
الەۋمەتتىك جەلى قولدانۋشىلارى جاريالانعان بەينەجازباعا پىكىر ءبىلدىرىپ، ەگەر كورسەتىلگەن فاكتىلەر راستالسا، وقيعاعا قۇقىقتىق باعا بەرىلىپ، ءتيىستى شارالار قابىلدانۋى ءتيىس ەكەنىن جازۋدا.
