AQŞ-ta tūratyn qazaqstandyq äieldıŋ üiınde jūmys ıstegen bala kütuşıge qatysty kämeletke tolmaǧan balaǧa küş qoldandy degen aiyptaular äleumettık jelıde jariialandy, dep habarlaidy "Adyrna" ūlttyq portaly Ūlysmediaǧa sıltep.
Jelı qoldanuşysy Margarita İmanälınıŋ mälımetınşe, onyŋ qūrbysy Nevada ştatynda Qazaqstan azamatyn bala kütuşı retınde jūmysqa qabyldaǧan. Aituynşa, jūmysqa ornalasar aldynda äiel barlyq qajettı anyqtamalar men ūsynym hattaryn ūsynǧan.
Alaida bır künı jūmys beruşıge qyzynyŋ qūlap jaraqat alǧany turaly habarlanǧan. Osydan keiın ol üidegı beinebaqylau kameralarynyŋ jazbalaryn qarap, onda bır jasar balaǧa qatysty qatygezdık sipatyndaǧy äreketter beinelengenın mälımdedı. Avtor jazbasyna beinejazbany da tırkegen. Onyŋ sözınşe, oqiǧadan keiın bala kütuşı bırden jūmystan şyǧarylǧan. Sonymen qatar ol atalǧan azamatşanyŋ Qazaqstanǧa oraluy mümkın ekenın aityp, tūrǧyndardy saq boluǧa şaqyrdy.
Äleumettık jelıde pıkır bıldırgen taǧy bır qoldanuşy da būl äieldıŋ öz üiınde bala kütuşı bolyp jūmys ıstegenın mälımdedı. Onyŋ aituynşa, qyzmetker bastapqyda jaqsy ūsynymdarmen kelgenımen, keiın būrynǧy jūmys beruşılerden jaǧymsyz pıkırler alǧany belgılı bolǧan.
Sondai-aq ol bala kütuşınıŋ agressivtı mınez körsetkenın, basqa kütuşılermen jäne ata-analarmen janjaldarǧa jiı aralasqanyn, balany qolynan tüsırıp alǧan jaǧdai bolǧanyn jäne üiden aqşa men keibır zattardyŋ joǧalǧanyn baiqaǧanyn alǧa tartty.
Jariialanǧan aqparatqa qatysty AQŞ qūqyq qorǧau organdarynyŋ resmi tüsınıktemesı nemese sot şeşımı äzırge jariialanǧan joq. Sonymen qatar bala kütuşıge taǧylǧan aiyptaular boiynşa onyŋ ūstanymy belgısız.
Äleumettık jelı qoldanuşylary jariialanǧan beinejazbaǧa pıkır bıldırıp, eger körsetılgen faktıler rastalsa, oqiǧaǧa qūqyqtyq baǧa berılıp, tiıstı şaralar qabyldanuy tiıs ekenın jazuda.
