ىشكى ىستەر مينيسترلىگى مەملەكەت باسشىسى قاسىم-جومارت توقاەۆ 2026 جىلعى 24 ماۋسىمدا قول قويعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تسيفرلاندىرۋ، دەربەس دەرەكتەردى قورعاۋ، جول قوزعالىسى جانە كولىكتەگى وزىق تەحنولوگيالاردى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا تۇسىنىكتەمە بەردى.
ۆەدومستۆونىڭ مالىمەتىنشە، جول قوزعالىسى سالاسىنداعى وزگەرىستەر جول قاۋىپسىزدىگىن ارتتىرۋعا، جۇرگىزۋشىلەردى ساپالى دايارلاۋ جۇيەسىن قالىپتاستىرۋعا جانە وسى سالاداعى مەملەكەتتىك باقىلاۋدى كۇشەيتۋگە باعىتتالعان.
وسىعان بايلانىستى جول قوزعالىسى قاۋىپسىزدىگىن قامتاماسىز ەتۋ جونىندەگى ۋاكىلەتتى ورگان – ىشكى ىستەر مينيسترلىگىنە جۇرگىزۋشىلەردى دايارلايتىن وقۋ ۇيىمدارىنا قىزمەت جۇرگىزۋگە رۇقسات بەرۋ جانە ولاردىڭ جۇمىسىن باقىلاۋ قۇزىرەتى بەرىلەدى.
زاڭداعى ماڭىزدى جاڭالىقتاردىڭ ءبىرى – ەلەكتروساموكاتتاردىڭ تروتۋارلار مەن جاياۋ جۇرگىنشىلەر جولدارىمەن جۇرۋىنە تىيىم سالۋ. مينيسترلىك مۇنداي كولىك قۇرالدارىنىڭ، اسىرەسە بالالار ءۇشىن، جاياۋ جۇرگىنشىلەر قاۋىپسىزدىگىنە ناقتى قاۋىپ توندىرەتىنىن اتاپ ءوتتى.
ۆەدومستۆو دەرەگىنشە، 2025 جىلى ەلىمىزدە ەلەكتروساموكات جۇرگىزۋشىلەرىنىڭ كىناسىنەن 139 جول-كولىك وقيعاسى تىركەلىپ، سالدارىنان 149 ادام جاراقات العان.
سونىمەن قاتار تۇزەتۋلەرگە سايكەس، "جول ءجۇرىسى تۋرالى" زاڭنان ەلدى مەكەندەردە قوزعالتقىشى جۇمىس ىستەپ تۇرعان كولىكتى تۇراقتا قالدىرۋعا قاتىستى تىيىم الىنىپ تاستالادى. بۇدان بولەك، جول قوزعالىسىن اۆتوماتتى تۇردە تىركەيتىن كامەرالاردى قولدانۋ اياسى كەڭەيتىلىپ، ەلەكتروموبيلدەر ءۇشىن ارنايى مەملەكەتتىك تىركەۋ نومىرلەرى ەنگىزىلەدى.
ىشكى ىستەر مينيسترلىگىنىڭ مالىمدەۋىنشە، ەنگىزىلگەن وزگەرىستەردىڭ بارلىعى جول قاۋىپسىزدىگىن كۇشەيتۋگە جانە جول قوزعالىسىنا قاتىسۋشىلار ءۇشىن قولايلى جاعداي جاساۋعا باعىتتالعان.
