Işkı ıster ministrlıgı Memleket basşysy Qasym-Jomart Toqaev 2026 jylǧy 24 mausymda qol qoiǧan "Qazaqstan Respublikasynyŋ keibır zaŋnamalyq aktılerıne sifrlandyru, derbes derekterdı qorǧau, jol qozǧalysy jäne kölıktegı ozyq tehnologiialardy retteu mäselelerı boiynşa özgerıster men tolyqtyrular engızu turaly" zaŋǧa tüsınıkteme berdı.
Vedomstvonyŋ mälımetınşe, jol qozǧalysy salasyndaǧy özgerıster jol qauıpsızdıgın arttyruǧa, jürgızuşılerdı sapaly daiarlau jüiesın qalyptastyruǧa jäne osy saladaǧy memlekettık baqylaudy küşeituge baǧyttalǧan.
Osyǧan bailanysty jol qozǧalysy qauıpsızdıgın qamtamasyz etu jönındegı uäkılettı organ – Işkı ıster ministrlıgıne jürgızuşılerdı daiarlaityn oqu ūiymdaryna qyzmet jürgızuge rūqsat beru jäne olardyŋ jūmysyn baqylau qūzyretı berıledı.
Zaŋdaǧy maŋyzdy jaŋalyqtardyŋ bırı – elektrosamokattardyŋ trotuarlar men jaiau jürgınşıler joldarymen jüruıne tyiym salu. Ministrlık mūndai kölık qūraldarynyŋ, äsırese balalar üşın, jaiau jürgınşıler qauıpsızdıgıne naqty qauıp töndıretının atap öttı.
Vedomstvo deregınşe, 2025 jyly elımızde elektrosamokat jürgızuşılerınıŋ kınäsınen 139 jol-kölık oqiǧasy tırkelıp, saldarynan 149 adam jaraqat alǧan.
Sonymen qatar tüzetulerge säikes, "Jol jürısı turaly" zaŋnan eldı mekenderde qozǧaltqyşy jūmys ıstep tūrǧan kölıktı tūraqta qaldyruǧa qatysty tyiym alynyp tastalady. Būdan bölek, jol qozǧalysyn avtomatty türde tırkeitın kameralardy qoldanu aiasy keŋeitılıp, elektromobilder üşın arnaiy memlekettık tırkeu nömırlerı engızıledı.
Işkı ıster ministrlıgınıŋ mälımdeuınşe, engızılgen özgerısterdıŋ barlyǧy jol qauıpsızdıgın küşeituge jäne jol qozǧalysyna qatysuşylar üşın qolaily jaǧdai jasauǧa baǧyttalǧan.
