قازاقستاننىڭ بىرنەشە قالاسىندا جەرگىلىكتى اكىمدىكتەر بەلسەندىلەرگە 31 مامىر ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي بەيبىت شەرۋ وتكىزۋگە رۇقسات بەرمەدى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
ازاماتتىق بەلسەندىلەر استانا، شىمكەنت، پاۆلودار، پەتروپاۆل جانە وسكەمەن قالالارىندا تاڭعى ۋاقىتتا شەرۋ ۇيىمداستىرماق بولعان. الايدا، اكىمدىكتەر ولاردىڭ وتىنىشتەرىن قابىلداماي، باس تارتقان.
مىسالى، پەتروپاۆل قالاسى اكىمدىگى جەرگىلىكتى بەلسەندىنىڭ حابارلاماسىنا بىلاي جاۋاپ بەرگەن:
«بەلگىلەنگەن ءتارتىپتى بۇزا وتىرىپ وتكىزىلگەن بەيبىت جينالىستاردى ۇيىمداستىرعانى جانە وعان قاتىسقانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا جاۋاپكەرشىلىك كوزدەلگەن. بۇل باپقا سايكەس، 15 تاۋلىككە دەيىن اكىمشىلىك قاماۋعا الۋ جازاسى قاراستىرىلعان».
اكىمدىكتەر بەيبىت جيىنعا رۇقسات بەرمەۋدىڭ سەبەبىن ءارتۇرلى فاكتورلارمەن تۇسىندىرگەن. ولاردىڭ ىشىندە: تولىق ەمەس اقپارات ۇسىنۋ، جيىن رەگلامەنتىنىڭ بولماۋى، جوسپارلانعان باسقا ءىس-شارالاردىڭ ءوتۋى، جينالىس ورنىنىڭ تالاپتارعا ساي كەلمەۋى جانە اباتتاندىرۋ جۇمىستارىنىڭ ءجۇرۋى بار.
ەسكە سالا كەتەيىك، قازاقستاندا 1997 جىلدان بەرى 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى رەتىندە بەلگىلەنگەن.
