اكىمدىكتەر اۋىلدى دامىتۋعا بولىنگەن 128 ملرد تەڭگە قارجىنى يگەرە الماي وتىر. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى ، دەپ حابارلايدى “ادىرنا” ۇلتتىق پورتالى.
«2022 جىلى 577 اۋىلدا ءبىر مىڭنان اسا جوبانى ىسكە اسىرۋعا 128 ملرد تەڭگە بولىنگەن. بيىل 1 قاڭتارداعى جاعداي بويىنشا وبلىس اكىمدىكتەرى بولىنگەن قاراجاتتىڭ 94%-ىن يگەرگەن»،- دەپ مالىمدەدى قۋانتىروۆ سەيسەنبى كۇنى ۇكىمەت وتىرىسىندا.
سونداي-اق، 7,7 ملرد تەڭگە قارجى يگەرىلمەي وتىر.
قاراجاتتىڭ دۇرىس يگەرىلمەۋى ۇلىتاۋ، ماڭعىستاۋ جانە باتىس قازاقستان وبلىسىندا تىركەلدى. ول ءۇشىن 2019-2022 جىلدارى رەسپۋبليكالىق بيۋدجەتتەن 326 ملرد تەڭگە ءبولىنىپ، 3,7 مىڭ جوبا ىسكە اسىرىلدى. مىسالى، 334 تۇرعىن ءۇي-كوممۋنالدىق شارۋاشىلىق وبەكتىسى، 1,2 مىڭ الەۋمەتتىك ينفراقۇرىلىم وبەكتىسى، 2,2 مىڭ كولىك ينفراقۇرىلىمى وبەكتىسى جاڭادان سالۋعا جانە جوندەۋگە مۇمكىندىك بەردى. ناتيجەسىندە شامامەن 30 مىڭ جۇمىس ورنى قۇرىلدى.
ەسكە سالساق، 2023 جىلعى 1 قاڭتارداعى جاعداي بويىنشا قازاقستاندا 6 293 اۋىل بار، وندا 7,8 ملن-عا جۋىق قازاقستاندىق تۇرىپ جاتىر. «اۋىل-ەل بەسىگى» جوباسىن ىسكە اسىرۋ ءۇشىن بولاشاعى بار 3,5 مىڭ اۋىل ىرىكتەلىپ الىندى.
