اسەم ءنۇسىپوۆا الماتى قالاسى اكىمىنىڭ ورىنباسارى قىزمەتىنەن ءوز ەركىمەن بوساتىلدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
رەسمي مالىمەتكە سايكەس، ول بۇل قىزمەتتى 2022 جىلدىڭ اقپان ايىنان باستاپ اتقارىپ كەلگەن. ونىڭ قاراماعىندا ءبىلىم بەرۋ، دەنساۋلىق ساقتاۋ، حالىقتى جۇمىسپەن قامتۋ جانە الەۋمەتتىك قورعاۋ سالالارى بولعان.
اسەم ءنۇسىپوۆا 1975 جىلى 1 مامىردا الماتى قالاسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى، ەكونوميكا جانە مەنەدجمەنت ماماندىعى بويىنشا ماگيستراتۋرا مەن اسپيرانتۋرانى تامامداعان.
ەڭبەك جولىن 1999 جىلى وسى ۋنيۆەرسيتەتتە اسسيستەنت بولىپ باستاعان. كەيىننەن قر قاۋىپسىزدىك كەڭەسىندە، پرەزيدەنت اكىمشىلىگىندە، قارجى مينيسترلىگىندە جانە پرەمەر-مينيستر كەڭسەسىندە ءارتۇرلى جاۋاپتى قىزمەتتەر اتقارعان.
2007–2008 جىلدارى دەنساۋلىق ساقتاۋ ۆيتسە-ءمينيسترى، 2016–2019 جىلدارى شىعىس قازاقستان وبلىسى اكىمىنىڭ ورىنباسارى، 2020 جىلى دەنساۋلىق ساقتاۋ مينيسترلىگىنىڭ جاۋاپتى حاتشىسى، 2020–2022 جىلدارى ۆيتسە-مينيستر لاۋازىمىندا بولعان.
ايتا كەتەيىك، الماتى قالاسىنىڭ جاڭا اكىمى دارحان ساتىبالدى قىزمەتكە كىرىسكەننەن كەيىن اكىمدىك قۇرامىندا بىرقاتار كادرلىق وزگەرىستەر ورىن الۋدا. سوڭعى ۋاقىتتا اكىمدىك اپپاراتىندا جەتى نەگىزگى لاۋازىم يەسى اۋىستى.
