الماتى وبلىسىنىڭ ىلە اۋدانىنا قاراستى اقشي اۋىلىندا اۋىز سۋعا قاتىستى تۋىنداعان كۇردەلى ماسەلەنى شەشۋ ءۇشىن جەدەل شارالار قابىلدانىپ جاتىر. جاعداي وبلىس اكىمى مارات سۇلتانعازيەۆتىڭ تىكەلەي باقىلاۋىندا.
اپاتتىڭ نەگىزگى سەبەبى — 1976 جىلدارى سالىنعان «بوزوي» توپتىق سۋ قۇبىرىنىڭ تولىق توزۋى. سوڭعى كۇندەرى ماگيسترال بىرنەشە جەردە جارىلىپ، اۋىلعا سۋ بەرۋ ءجيى ۇزىلگەن. تەكسەرۋ بارىسىندا قۇبىردىڭ 2 شاقىرىمنان استام بولىگى جارامسىز دەپ تانىلىپ، بۇل ۋچاسكەلەردى قالپىنا كەلتىرۋ ۋاقىتشا توقتاتىلدى.
اۋىز سۋ بەرۋ توقتاعان كەزەڭدە ىلە اۋدانى اكىمدىگى ارنايى سۋ تاسيتىن كولىكتەردى جۇمىلدىرىپ، تۇرعىنداردى تاۋلىك بويى اۋىز سۋمەن قامتاماسىز ەتىپ وتىر.
ماسەلەگە قاتىستى بىرقاتار اۋىل تۇرعىندارى وبلىس اكىمىنە الەۋمەتتىك جەلى ارقىلى دا جۇگىنگەن.
اپپاراتتىق كەڭەستە مارات سۇلتانعازيەۆ ماسەلەنى شۇعىل شەشۋدى تاپسىردى. جاۋاپتى باسقارمالار مەن اۋدان اكىمدىگىنە ناقتى مىندەت جۇكتەلىپ، تومەندەگى شارالار قولعا الىندى:
• 18 قاراشادا تجد مەن اۋدان اكىمدىگى اپات ورنىن تەكسەرەدى.
الماتى وبلىسىنىڭ توتەنشە جاعدايلار دەپارتامەنتى مەن ىلە اۋدانىنىڭ اكىمدىگى اپات ايماعىن ارالاپ، كەلتىرىلگەن شىعىندى ناقتىلايدى.
• 2,6 شاقىرىمدىق قۇبىر تولىق اۋىستىرىلادى.
«تەحنوگەندىك توتەنشە جاعداي» رەجيمى اياسىندا شامامەن 2,6 كم سۋ جەلىسىن قايتا سالۋ جوسپارلانۋدا. قازىرگى تاڭدا جوبالىق-سمەتالىق قۇجاتتامانى جاڭارتۋ جانە جوندەۋ جۇمىستارىنا قاجەتتى قارجىنى ناقتىلاۋ ءجۇرىپ جاتىر. قۇبىردى تولىق اۋىستىرۋ اقشي اۋىلىن ۇزاق مەرزىم بويى تۇراقتى اۋىز سۋمەن قامتاماسىز ەتۋگە مۇمكىندىك بەرەدى.
18 قاراشادا ىلە اۋدانىنىڭ اكىمى قايىرجان جاقسىمبەتوۆ جاعداي ورنىنا بارىپ، تۇرعىندارمەن كەزدەسىپ، ءتۇسىندىرۋ جۇمىستارىن جۇرگىزدى. اكىمنىڭ ايتۋىنشا، ءبىر ايدىڭ ىشىندە بارلىق اقاۋلار قالپىنا كەلتىرىلىپ، اۋىلعا اۋىز سۋ قايتا بەرىلەدى.
قازىرگى ۋاقىتتا ەلدى مەكەندى سۋمەن قامتاماسىز ەتۋ ءۇشىن ءتورت سۋ تاسىمالداۋ كولىگى ۇزدىكسىز جۇمىس ىستەپ تۇر.
