اڭگىمەمىزدى ترەندكە اينالعان تەندەنتسيادان باستاساق. قازىر قوعامدا جاقسىلىق جاساۋدان جارىساتىن جاندار كوپ. مەكتەپ وقۋشىسىنان باستاپ، ءمۇيىزى قاراعايداي ازاماتتارىمىزعا دەيىن قايىرىمدىلىق ءۇشىن كومەك جيناپ جاتادى. ارينە، كوبىنە اقشالاي. جينالعان قاراجاتتىڭ قايدا كەتەتىنىن سۇراپ قالساڭ، بالالار ۇيىنە، قايىرىمدىلىق ۇيىنە جانە تاعى باسقا دەپ جاۋاپ بەرەدى كەيبىرى.
ماقۇل، ءجون-اق. ىزگىلىكتىڭ تامىر جايعانى جاقسى قۇبىلىس. بىراق سول جينالعان قاراجاتتىڭ قايدا كەتىپ جاتقانىنا كەيدە كوزىمىز جەتە بەرمەيدى. قاپتاعان قايىرىمدىلىق قورلارىنىڭ كوپتىگى سونشالىق اتىنان، ءتىپتى سانىنان شاتاسۋعا بولادى. كوشەدە كەلە جاتساڭ، قولىنا قورابىن ۇستاعان جاستار جۇگىرىپ جەتىپ كەلەدى. قوراپتىڭ سىرتىندا بەلگىسىز ءبىر قوردىڭ نە قايىرىمدىلىق ءۇيىنىڭ اتى جازىلعانىن بايقايسىڭ. ءبىرىن سوزگە تارتىپ سۇراساڭ، ەشتەڭە ايتا المايدى. «بىزگە جيناۋعا عانا تاپسىرما بەرىلگەن» دەيدى. سول ءۇشىن اقى الاتىنىن ايتادى.
مۇنىڭ ءوزى كوڭىلگە كۇدىك ۇيالاتپاي ما؟ ادامدار نەگە قايىرىمدىلىق ۇيلەرىن اشۋعا قۇمار بولىپ الدى؟ ودان نە پايدا؟ جالپى قايىرىمدىلىق ءۇشىن بىرەۋلەر قالتاسىنداعى سوڭعى تيىنىن تاستاسا، ال كەيبىرەۋلەرى بۋما-بۋما اقشالارىن اتايدى. جيناۋشىلار ونى الىپ، ۇيسىزگە ءۇي اپەرىپ، جاعدايى جوقتى جارىلقايتىنى بار. ەسەبىن جالپىعا ورتاق قىلىپ الەۋمەتتىك جەلىدە جاريالايدى. ال ەسەپسىزدەرى قانشاما؟! بۇدان قايىرىمدىلىق قورلارى پايدا كورمەسە، نە ءۇشىن جاسايدى دەگەن سۇراق تۋىندايدى. سەبەبى ەسەپتىڭ زامانى عوي. كەيبىر قايىرىمدىلىق ۇيلەرى جەتەكشىسىن سۇراق استىنا الساڭ، استارلاپ اقىرى اشىعىن ايتپاي كەتەدى. تابىسىن جاسىرادى. وسىدان كەيىن قالايشا، جامان ويلاماۋعا بولادى.
قايىرىمدىلىقتى جوسپارلاۋ مۇمكىن ەمەس. كەي كاسىپكەرلەر مەملەكەتكە سالىق تولەۋدەن قاشىپ (جاسىرىن), تابىسىنىڭ جارتىسىن قايىرىمدىلىق قورلارىنا اۋدارادى. ونىڭ ەسەبى سۇرالمايتىنى انىق. ال قور تۇپتەپ كەلگەندە كاسىپكەرگە جاقىن ادامعا تيەسىلى بولىپ شىعادى.
وكىنىشكە قاراي، قايىرىمدىلىقتىڭ وسىنداي قايىرىمسىز تۇرلەرى دە بار. ولار ورىن الىپ تا جاتقان شىعار. قىسقاسى، بۇل قۇبىلىس الەۋمەتتىك جەلىلەردە دە اشىق كورىنىس تاپقان. قايىرىمدىلىق ءۇشىن قاراجات جيناۋعا ۇندەگەن بلوگەرلەردىڭ بەينەجازبالارىنان كوزىڭ سۇرىنەدى. ارينە، كوپكە توپىراق شاشا المايمىز. بىراق ونىڭ ارتىندا كىمدەر تۇرعانىنا ۇڭىلە دە بەرمەيمىز. بۇل اۋرۋعا اينالعانى سونشالىق، ارتىن سۇراستىرماي اۋزىن اشقانعا اۋدارا سالاتىندى شىعارعانبىز. بۇل دەرت ەمەي نەمەنە؟
ءتىپتى كەيبىر قايىرىمدىلىق مەكەملەرى ءوز تاربيەلەنۋشىلەرىن بازار مەن ساۋدا ورىندارىنا قاراجات جيناۋعا جىبەرەدى ەكەن دەگەن سىبىستاردى قۇلاعىمىز شالىپ جاتادى.
بۇدان بولەك، قايىرىمدىلىق مەكەمەلەرى دەگەن كەيبىر ۇيىمدارعا قاتىستى ءبىراز شۋ شىعىپ، ەلدى دۇرلىكتەرگەنى دە راس جىل باسىندا. ءتىپتى ولاردىڭ قاۋىپتى ءدىني اعىممەن بايلانىسى تۋرالى اقپاراتتاردا تارالدى
بارلىق اقپارات ءجۇز پايىز سەنىمدى دەپ ايتا المايمىز، ارينە، دەگەنمەن جەل تۇرماسا ءشوپتىڭ باس قيمىلداماسى انىق.
قايىرىمدىلىق اتىن جامىلعان ۇيىمداردىڭ نەگىزگى ماقساتى قانداي جانە كوكسەگەنى نە دەگەن سۇراقتىڭ تۋىنداۋى بۇل زاڭدىلىق.
جالپى، ايتپاعىمىز قايىرىمدىلىق قايىرلى بولسا ەكەن. قاراجاتىڭىز قايداعى جوق بىرەۋدىڭ قالتاسىنا كەتپەي، شىن مۇقتاجعا جەتسە ەكەن دەگەن تىلەك پەن تالپىنىس.
«ادىرنا» ۇلتتىق پورتالى
