Áńgimemizdi trendke aınalǵan tendenııadan bastasaq. Qazir qoǵamda jaqsylyq jasaýdan jarysatyn jandar kóp. Mektep oqýshysynan bastap, múıizi qaraǵaıdaı azamattarymyzǵa deıin qaıyrymdylyq úshin kómek jınap jatady. Árıne, kóbine aqshalaı. Jınalǵan qarajattyń qaıda ketetinin surap qalsań, balalar úıine, qaıyrymdylyq úıine jáne taǵy basqa dep jaýap beredi keıbiri.
Maqul, jón-aq. Izgiliktiń tamyr jaıǵany jaqsy qubylys. Biraq sol jınalǵan qarajattyń qaıda ketip jatqanyna keıde kózimiz jete bermeıdi. Qaptaǵan qaıyrymdylyq qorlarynyń kóptigi sonshalyq atynan, tipti sanynan shatasýǵa bolady. Kóshede kele jatsań, qolyna qorabyn ustaǵan jastar júgirip jetip keledi. Qoraptyń syrtynda belgisiz bir qordyń ne qaıyrymdylyq úıiniń aty jazylǵanyn baıqaısyń. Birin sózge tartyp surasań, eshteńe aıta almaıdy. «Bizge jınaýǵa ǵana tapsyrma berilgen» deıdi. Sol úshin aqy alatynyn aıtady.
Munyń ózi kóńilge kúdik uıalatpaı ma? Adamdar nege qaıyrymdylyq úılerin ashýǵa qumar bolyp aldy? Odan ne paıda? Jalpy qaıyrymdylyq úshin bireýler qaltasyndaǵy sońǵy tıynyn tastasa, al keıbireýleri býma-býma aqshalaryn ataıdy. Jınaýshylar ony alyp, úısizge úı áperip, jaǵdaıy joqty jarylqaıtyny bar. Esebin jalpyǵa ortaq qylyp áleýmettik jelide jarııalaıdy. Al esepsizderi qanshama?! Budan qaıyrymdylyq qorlary paıda kórmese, ne úshin jasaıdy degen suraq týyndaıdy. Sebebi eseptiń zamany ǵoı. Keıbir qaıyrymdylyq úıleri jetekshisin suraq astyna alsań, astarlap aqyry ashyǵyn aıtpaı ketedi. Tabysyn jasyrady. Osydan keıin qalaısha, jaman oılamaýǵa bolady.
Qaıyrymdylyqty josparlaý múmkin emes. Keı kásipkerler memleketke salyq tóleýden qashyp (jasyryn), tabysynyń jartysyn qaıyrymdylyq qorlaryna aýdarady. Onyń esebi suralmaıtyny anyq. Al qor túptep kelgende kásipkerge jaqyn adamǵa tıesili bolyp shyǵady.
Ókinishke qaraı, qaıyrymdylyqtyń osyndaı qaıyrymsyz túrleri de bar. Olar oryn alyp ta jatqan shyǵar. Qysqasy, bul qubylys áleýmettik jelilerde de ashyq kórinis tapqan. Qaıyrymdylyq úshin qarajat jınaýǵa úndegen blogerlerdiń beınejazbalarynan kóziń súrinedi. Árıne, kópke topyraq shasha almaımyz. Biraq onyń artynda kimder turǵanyna úńile de bermeımiz. Bul aýrýǵa aınalǵany sonshalyq, artyn surastyrmaı aýzyn ashqanǵa aýdara salatyndy shyǵarǵanbyz. Bul dert emeı nemene?
Tipti keıbir qaıyrymdylyq mekemleri óz tárbıelenýshilerin bazar men saýda oryndaryna qarajat jınaýǵa jiberedi eken degen sybystardy qulaǵymyz shalyp jatady.
Budan bólek, qaıyrymdylyq mekemeleri degen keıbir uıymdarǵa qatysty biraz shý shyǵyp, eldi dúrliktergeni de ras jyl basynda. Tipti olardyń qaýipti dinı aǵymmen baılanysy týraly aqparattarda taraldy
Barlyq aqparat júz paıyz senimdi dep aıta almaımyz, árıne, degenmen jel turmasa shóptiń bas qımyldamasy anyq.
Qaıyrymdylyq atyn jamylǵan uıymdardyń negizgi maqsaty qandaı jáne kóksegeni ne degen suraqtyń týyndaýy bul zańdylyq.
Jalpy, aıtpaǵymyz qaıyrymdylyq qaıyrly bolsa eken. Qarajatyńyz qaıdaǵy joq bireýdiń qaltasyna ketpeı, shyn muqtajǵa jetse eken degen tilek pen talpynys.
«Adyrna» ulttyq portaly
