Bügın Abai atyndaǧy Qazaq ūlttyq pedagogikalyq universitetınde «Bos oryndar järmeŋkesı – 2026» atty auqymdy ıs-şara joǧary deŋgeide öttı. Järmeŋkege elımızdıŋ tükpır-tükpırınen kelgen 250-ge juyq mekeme qatysty. Olardyŋ qatarynda mektepter, kolledjder, balabaqşalar men bılım beru ūiymdary bar. Jūmys beruşıler järmeŋkede türlı baǧyttaǧy 1214 bos jūmys ornyn ūsyndy.
Is-şaranyŋ maqsaty – bıtıruşı tülekterdı eŋbek naryǧymen tıkelei bailanystyru, jūmys beruşıler men jas mamandar arasynda tiımdı ärıptestık ornatu, sondai-aq käsıbi baǧdar beru jūmystaryn jüielı türde damytu boldy.
Järmeŋkenıŋ aşyluynda universitettıŋ Akademiialyq qyzmet jönındegı prorektory Banu Narbekova qūttyqtau söz söilep, şaranyŋ maŋyzdylyǧyna erekşe toqtaldy.
"Bügıngı «Bos oryndar järmeŋkesı – 2026» – universitetımızdıŋ eŋbek naryǧymen tyǧyz yqpaldastyǧyn aiqyndaityn maŋyzdy strategiialyq alaŋ. Qazırgı taŋda universitet 250-den astam jūmys beruşı mekememen tūraqty ärıptestık ornatyp otyr. Sonyŋ nätijesınde soŋǧy oqu jylynda tülekterdı jūmysqa ornalastyru körsetkışı 95 paiyzǧa jettı. Būl – sapaly bılım men täjıribege negızdelgen daiarlyqtyŋ naqty jemısı", – dedı prorektor.
Sonymen qatar ol mūndai bastamalar studentterdıŋ käsıbi qalyptasuyna tıkelei yqpal etetının atap ötıp:
"Bızdıŋ maqsat – tülekterge tek diplom beru emes, olardyŋ eŋbek naryǧynda öz ornyn tabuyna naqty jaǧdai jasau. Bügıngı järmeŋke– sol jüielı jūmystyŋ zaŋdy jalǧasy", – dedı.
Sonymen qatar, järmeŋke aiasynda universitet tülekterın jūmyspen qamtuǧa baǧyttalǧan mansap-bosoryn.kz sifrlyq platformasynyŋ mümkındıkterı keŋınen tanystyryldy. Atalǧan platformada jūmys beruşıler ūsynǧan bos jūmys oryndary jariialanyp, bıtıruşı tülekter sol arqyly tıkelei ötınım bere alady. Jıberılgen ötınımder bırden jūmys beruşınıŋ elektrondy poştasyna jäne WhatsApp bailanys nömırıne joldanyp, jūmysqa ornalasu üderısın jedeldetıp, aşyq ärı tiımdı formatta ūiymdastyruǧa mümkındık beredı.
Is-şara barysynda jūmys beruşıler öz ūiymdarynyŋ qyzmet baǧyttaryn tanystyryp, ūsynylyp otyrǧan bos jūmys oryndary turaly jan-jaqty aqparat berdı. Sonymen qatar, jas mamandar men mekeme ökılderı arasynda tıkelei bailanys ornap, aşyq formatta pıkır almasu alaŋy qalyptasty. Būl öz kezegınde tülekterdıŋ käsıbi baǧdaryn aiqyndap, eŋbek naryǧyna senımdı qadam jasauyna jol aşty.
Aita ketu kerek, «Bos oryndar järmeŋkesı – 2026» ıs-şarasy universitettıŋ «Mansap» ortalyǧynyŋ ūiymdastyruymen jüzege asyrylyp, bılım men öndırıs arasyndaǧy bailanysty nyǧaituǧa, sondai-aq jas mamandardyŋ jūmyspen qamtyluyna baǧyttalǧan maŋyzdy bastamalardyŋ bırı retınde erekşelendı.
Is-şara soŋynda järmeŋkege qatysqan barlyq mekeme ökılderıne Käsıbi baǧdar jäne mansapty damytu departamentınıŋ direktory Almas Naimanbaev universitettıŋ Basqarma Töraǧasy Rektory Bolat Tılep atynan Alǧys hattar tabystady. Sondai-aq, serıktesterge özara ärıptestıktı damytuǧa qosqan ülesterı üşın rizaşylyq bıldırdı.
