قازاقستاندا اەس سالۋعا قانشا قاراجات كەتەتىنى ايتىلدى. بۇل جايىندا «قازاقستاندىق اتوم ەلەكتر ستانتسيالارى» جشس باس ديرەكتورى تيمۋر جانتيكين مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ەلىمىزگە اتوم ەلەكتر ستانتسياسىن سالۋ بويىنشا 4 جوبا قاراستىرىلىپ جاتىر.
«بۇگىنگى تاڭدا ەلىمىزدە اتوم ەلەكتر ستانتسياسىن سالۋ ءۇشىن 10-15 ميلليارد دوللار كەرەك. قۇجاتتار شامامەن 5 جىل ازىرلەنەدى. ويتكەنى، ءبىرىنشى كەزەڭدە تەحنيكالىق-ەكونوميكالىق نەگىزدەمەنى ازىرلەۋگە 1,5-2 جىل كەرەك. سودان كەيىن ۇكىمەت اەس سالۋ تۋرالى وڭ شەشىم قابىلداسا، جوبالاۋ-سمەتالىق قۇجاتتاما ازىرلەنەدى. وعاندا ۋاقىت قاجەت. اەس شاشامەن 5 جىل سالىنادى. ياعني اتوم ەلەكتر ستانتسياسىن 2035 جىلى ىسكە قوسامىز دەپ ويلايمىز»، - دەدى تيمۋر جانتاڭين استانادا وتكەن «بەيبىت اتوم» رەسپۋبليكالىق سەمينارىندا.
سونداي-اق، ول اەس سالۋ ءۇشىن 2 ورىن قاراستىرىلعانىن ايتتى.
«ازىرگە تەك ءبىر ورىن قاراستىرىلىپ جاتىر. ءىس جۇزىندە 2 ورىن قاراستىرىلعان: شقو جانە وڭتۇستىكتە. وڭتۇستىك قازاقستان ەنەرگوجۇيەنىڭ شارتى بويىنشا بۇرىنعى گرەس الاڭىنىڭ ورنى بولىپ سانالادى. سودان كەيىن الماتى وبلىسى ۇلكەن كەنتى تاڭدالدى. ول بالقاش كولىندە ورنالاسقان.
ءبىرىنشى ستانتسيا 10-15 ملرد دوللار بولادى. سەبەبى، ول – العاشقى ستانتسيا. قازىر قارجىلاندىرۋ كوزى پىسىقتالىپ جاتىر. بۇل – نەگىزىنەن حالىقارالىق قارجى ينستيتۋتتارى. جوبا ازىرگە كوممەرتسيالىق بولىپ سانالادى. مەملەكەت وعان ارالاسپايدى. تيىسىنشە ونىڭ شارتتارى دا بار»، - دەدى جانتاكين.
