قوستاناي وبلىسىنىڭ قۇتقارۋشىلارى سۋداعى قاۋىپسىزدىك ەرەجەلەرىن ساقتاۋ قاجەتتىگىن ەسكە سالۋ ماقساتىندا قالالىق جاعاجايدا ينستاللياتسيا ورناتتى، دەپ حابارلايدى "ادىرنا" ۇلتتىق پورتالى.
توتەنشە جاعدايلار دەپارتامەنتىنىڭ مالىمەتىنشە، اكتسيا اياسىندا جاعاجايعا وڭىردەگى سۋ ايدىندارىندا قازا تاپقان ادامداردىڭ جاسى جازىلعان قۇتقارۋ كەۋدەشەلەرىنىڭ ماكەتتەرى قويىلعان. باستامانىڭ نەگىزگى ماقساتى – دەمالۋشىلاردىڭ نازارىن سۋداعى قاۋىپسىزدىككە اۋدارىپ، قايعىلى وقيعالاردىڭ الدىن الۋ.
ۇيىمداستىرۋشىلاردىڭ ايتۋىنشا، ينستاللياتسياداعى ءاربىر كەۋدەشەدە سۋعا كەتكەن ادامنىڭ جاسى كورسەتىلگەن. وسى ارقىلى قۇتقارۋ كەۋدەشەسىنىڭ ادام ءومىرىن ساقتاپ قالۋداعى ماڭىزىن ەسكە سالۋ كوزدەلگەن.
ۆەدومستۆونىڭ حابارلاۋىنشا، كورسەتىلگەن قايعىلى وقيعالاردىڭ باسىم بولىگى شومىلۋعا رۇقسات ەتىلمەگەن جەرلەردە سۋعا ءتۇسۋ، ماس كۇيىندە شومىلۋ نەمەسە ءوز مۇمكىندىگىن دۇرىس باعالاماۋ سالدارىنان بولعان. قازا بولعانداردىڭ اراسىندا بالالار مەن جاسوسپىرىمدەر دە بار.
«سوڭعى ءجۇزۋ» دەپ اتالعان پروفيلاكتيكالىق اكتسيا سۋداعى قاۋىپسىزدىك تالاپتارىن بۇزۋدىڭ سالدارىن كورنەكى تۇردە كورسەتۋگە جانە تۇرعىنداردىڭ جاۋاپكەرشىلىگىن ارتتىرۋعا باعىتتالعان.
الەۋمەتتىك جەلى قولدانۋشىلارى بۇل باستاماعا ءارتۇرلى پىكىر ءبىلدىردى. ءبىرى مۇنداي ەسكەرتۋ ءتاسىلىن ءتيىمدى دەپ باعالاسا، ەندى ءبىرى ونى تىم اسەرلى ءارى ۇرەيلى ءادىس دەپ ساناعان.
