جەتىسۋ وبلىسىندا «الماتى–وسكەمەن» اۆتوجولىندا بولعان جول-كولىك وقيعاسى سالدارىنان بەس ادام كوز جۇمدى، دەپ حابارلايدى "ادىرنا" ۇلتتىق پورتالى.
وبلىستىق پوليتسيا دەپارتامەنتىنىڭ مالىمەتىنشە، قايعىلى وقيعا كەشە كەشكى ۋاقىتتا «الماتى–وسكەمەن» تاسجولىنىڭ 432-شاقىرىمىندا ەكى اۆتوكولىكتىڭ قاتىسۋىمەن بولعان. اپات سالدارىنان ەكى كولىكتىڭ جۇرگىزۋشىسى مەن ءۇش جولاۋشى وقيعا ورنىندا قازا تاپقان. سونىمەن قاتار ءتۇرلى دەنە جاراقاتىن العان تاعى ەكى جولاۋشى مەديتسينالىق مەكەمەگە جەتكىزىلدى.
اتالعان دەرەك بويىنشا قىلمىستىق ءىس قوزعالدى. قازىرگى ۋاقىتتا جول اپاتىنىڭ ءمان-جايى مەن سەبەپتەرىن انىقتاۋعا باعىتتالعان سوتقا دەيىنگى تەرگەۋ امالدارى جۇرگىزىلىپ جاتىر.
وسىعان بايلانىستى پوليتسيا جۇرگىزۋشىلەردى جول قوزعالىسى ەرەجەلەرىن قاتاڭ ساقتاۋعا، قاۋىپسىز جىلدامدىقتى تاڭداۋعا، اراقاشىقتىقتى ۇستانۋعا جانە كولىك تىزگىنىندە بارىنشا مۇقيات بولۋعا شاقىردى.
