قىتايدا حالىق-ازاتتىق ارمياسىنىڭ التى گەنەرالى بۇكىلقىتايلىق حالىق وكىلدەرى جينالىسى مەن قىتاي كوممۋنيستىك پارتياسىنىڭ قاتارىنان شىعارىلدى، دەپ حابارلايدى «ادىرنا» ءتىلشىسى «انادولۋ» باسىلىمىنا سىلتەمە جاساپ.
ساراپشىلاردىڭ پىكىرىنشە، بۇل شەشىم اسكەري قىزمەتكەرلەرگە قاتىستى باستالعان سىبايلاس جەمقورلىق ىستەرى بويىنشا تەرگەۋلەرمەن بايلانىستى بولۋى مۇمكىن.
پارتيا قاتارىنان شىعارىلعانداردىڭ اراسىندا قارۋ-جاراقتى دامىتۋ باسقارماسىنىڭ باسشىسى شۋ سيۋەسيان، ساياسي كوميسسارلار گو پۋسياو، لي فينبياو جانە ين حۋنسين بار. سونداي-اق بىرىككەن ماتەريالدىق-تەحنيكالىق قامتاماسىز ەتۋ كۇشتەرىنىڭ قولباسشىسى ۆان كانپين مەن كيبەركەڭىستىك كۇشتەرىنىڭ قولباسشىسى تسان مينحۋا دا تىزىمگە ەنگەن.
بۇدان بولەك، پارلامەنت قۇرامىنان قىتاي كوممۋنيستىك پارتياسى ساياسي بيۋروسىنىڭ بۇرىنعى مۇشەسى ما سينجۋي جانە شىڭجاڭ-ۇيعىر اۆتونوميالىق اۋدانىنداعى پارتيا كوميتەتىنىڭ بۇرىنعى حاتشىسى گو يۋنحان سياقتى جوعارى لاۋازىمدى پارتيا قايراتكەرلەرى شىعارىلعان.
ەسكە سالايىق، سوڭعى ءۇش جىلدا قىتايدا جوعارى شەندى اسكەري قىزمەتكەرلەر مەن پارتيا شەنەۋنىكتەرىن ارميا مەن پارتيا قاتارىنان شىعارۋ، سونداي-اق ولاردى پارلامەنتتەگى قىزمەتتەرىنەن شەتتەتۋ ءۇردىسى بايقالىپ كەلەدى.
بۇعان دەيىن قىتايدىڭ بۇرىنعى قورعانىس مينيسترلەرى ۆەي فەنحە مەن لي شانفۋ سىبايلاس جەمقورلىق ايىپتارى بويىنشا سوتتالعان بولاتىن. سوت ولاردى كىنالى دەپ تانىپ، ءولىم جازاسىنا كەسكەن، الايدا ۇكىمنىڭ ورىندالۋى كەيىنگە قالدىرىلعان.
