اباي وبلىسىنىڭ اكىمى بەرىك ءۋالي اياگوز حالقىمەن كەزدەسۋدە «اياگوز-باقتى» تەمىرجولى مەن وسى جوبادا جۇمىس ىستەپ جۇرگەن شەتەلدىك ماماندارعا قاتىستى تۇسىنىك بەردى.
«قىتايدان قاشۋدىڭ كەرەگى جوق. قازىر بۇكىل الەم قىتايدىڭ ينۆەستيتسياسىنا تالاسىپ وتىر. ولار ءبىزدىڭ جولىمىزدى سالىپ جاتىر. بۇل – ەل ەكونوميكاسىنا ۇلكەن مۇمكىندىك. ەڭ باستىسى، جەرگىلىكتى تۇرعىنداردى سول جوبالارعا كوبىرەك تارتۋىمىز كەرەك. بۇعان دەيىن «ومبى-مايقاپشاعاي» كۇرە جولىنىڭ «قالباتاۋ-مايقاپشاعاي» ارالىعىن سالعان كەزدە 200-گە جۋىق جەرگىلىكتى ازامات جۇمىس ىستەگەن. ءبىزدىڭ حالىقتىڭ يگىلىگىنە پايدالانۋعا بەرىلگەن سوڭ، جۇمىسشىلار ەلىنە قايتتى. سول تاجىريبە جالعاسادى. قاراپايىم حالىقتى قىتايعا قارسى قويۋعا بولمايدى. قىتاي حالقى الەمنىڭ بارلىق ەلىندە جۇمىس ىستەپ ءجۇر»، – دەدى ول.
اكىمنىڭ ايتۋىنشا، 300 شاقىرىمدىق تەمىرجول وبلىستىڭ، اياگوزدىڭ جاڭا تىنىسىن اشادى.
«الداعى 2 جىل ىشىندە تەمىرجول سالىنادى، ونىڭ بويىنا باسقا دا ادامدار كەلەدى. ونىڭ ءبارى – اقشا، ءبىزدىڭ وبلىسىمىزدىڭ ەكونوميكاسىنا قۇيىلعان قارجى. ۇلكەن ينۆەستيتسيا. ولاردى ءبىز قايتا تارتۋىمىز قاجەت. پرەزيدەنت قاسىم-جومارت كەمەلۇلى توقاەۆ پەن قىتاي ەلىنىڭ توراعاسى سي تسزينپينگە راحمەت، ەكى ەلدىڭ اراسىنداعى بارىس-كەلىستى ارتتىرۋ ءۇشىن ۆيزاسىز رەجيم جاسادى. سىزدەر دە قىتايعا بارىپ ساۋدا جاساڭىزدار. قىتايدىڭ تۋريستەرى وسىندا كەلىپ جاتىر. ءۇيىڭىزدىڭ قاسىنان سولارعا قىزمەت كورسەتەتىن ورىن اشىڭىز. قوي باعىڭىز، ءونىمىن وتكىزىڭىز. بيىل الاكولگە قانشاما قىتاي تۋريستەرى كەلدى. ولار وسىندا قالىپ قويىپ جاتقان جوق قوي. كەلىپ، جۇمىس ىستەپ، قايتادان ەلدەرىنە كەتىپ جاتىر»، – دەدى وبلىس باسشىسى.
بەرىك ءۋالي «اياگوز–باقتى» تەمىر جولى اياقتالعاننان كەيىن، وبلىستىڭ، اياگوز اۋدانىنىڭ ەكىنشى، ءۇشىنشى تىنىسى اشىلاتىنىن جەتكىزدى.
