اباي وبلىسىندا III وبلىستىق «مىڭ بالا» مادەني-اعارتۋشىلىق بايقاۋىنىڭ وڭىرلىك ىرىكتەۋ كەزەڭى ءوز مارەسىنە جەتتى. بيىلعى بايقاۋعا ءوڭىردىڭ تۇكپىر-تۇكپىرىنەن 33 ونەرپاز قاتىسىپ، «الەۋمەتتىك جەلىلەردەگى مانەرلەپ وقۋ» جانە «بىرلىككە ءۇن قوسقان» مۋزىكالىق نوميناتسيالارى بويىنشا باق سىنادى. قازىلار القاسى قاتىسۋشىلاردىڭ ورىنداۋشىلىق شەبەرلىگىن، شىعارمانى كوركەم جەتكىزۋ مانەرىن، قازاق ءتىلىن مەڭگەرۋ دەڭگەيىن جانە شىعارماشىلىق ەرەكشەلىگىن باعالادى.
اباي وبلىسىنىڭ ىشكى ساياسات باسقارماسىنىڭ باسشىسى جارقىن تۇسىپبەكۇلى بايقاۋدىڭ مەملەكەتتىك ءتىلدى دامىتۋ مەن قوعامدىق كەلىسىمدى نىعايتۋداعى ماڭىزىن اتاپ ءوتتى.
– مەملەكەت باسشىسى جاستاردىڭ قوعامدىق كەلىسىم مەن ەتنوسارالىق تاتۋلىقتى ساقتاۋدا، مەملەكەتتىك ءتىلدىڭ قولدانىس اياسىن كەڭەيتۋدە ماڭىزدى ءرول اتقاراتىنىن ۇنەمى ايتىپ كەلەدى. وسى تۇرعىدا «مىڭ بالا» جوباسى دا ءوز ناتيجەسىن كورسەتىپ وتىر. جوباعا قاتىسقان جاستار مەملەكەتتىك ءتىلدى مەڭگەرىپ قانا قويماي، قازاق حالقىنىڭ مادەنيەتى مەن سالت-ءداستۇرىن تانىپ، ءوز ونەرى مەن قابىلەتىن دامىتۋعا مۇمكىندىك الادى. بۇگىندە ولاردىڭ اراسىنان ءتۇرلى سالادا ەڭبەك ەتىپ، ەل دامۋىنا ۇلەس قوسىپ جۇرگەن ازاماتتار بار. بۇل – جوبانىڭ ناقتى ناتيجەسى. «مىڭ بالا» مەملەكەتتىك ءتىلدى ۇيرەنۋگە ىنتالاندىرىپ، ەل بىرلىگىن نىعايتۋعا باعىتتالعان ماڭىزدى الاڭ، – دەدى باسقارما باسشىسى.
وڭىرلىك كەزەڭنىڭ قورىتىندىسى بويىنشا سەمەي قالاسىنداعى ق.ساتباەۆ اتىنداعى №2 مەكتەپتىڭ 5-سىنىپ وقۋشىسى سولوۆيوۆا سوفيا جەڭىمپاز اتانىپ، رەسپۋبليكالىق كەزەڭگە جولداما الدى. ول الداعى بايقاۋدا اباي وبلىسىنىڭ نامىسىن قورعايدى.
سونداي-اق، «الەۋمەتتىك جەلىلەردەگى مانەرلەپ وقۋ» نوميناتسياسىندا مالتسەۆ رۋسلان ءى ورىنعا يە بولسا، تلەكۇلى دىنمۇحامەد ءىى ورىن، سۋلەيمەنوۆا اياۋلىم ءىىى ورىندى يەلەندى. ال «بىرلىككە ءۇن قوسقان» مۋزىكالىق نوميناتسياسىندا سولوۆيوۆا سوفيا جەڭىمپاز اتانسا، اشيموۆا كاميللا ءىى ورىنعا، زاگيدۋللينا نايما ءىىى ورىنعا لايىق دەپ تانىلدى.
بايقاۋ قورىتىندىسىندا جەڭىمپازدار مەن جۇلدەگەرلەر ديپلومدارمەن جانە باعالى سىيلىقتارمەن ماراپاتتالدى.
