اباي وبلىسىنا جۇمىس ساپارىمەن قازاقستان حالىق كەڭەسىنىڭ مۇشەسى نۇرتاي سابيليانوۆ پەن قۇرىلتاي دەپۋتاتى ايرات بازەنوۆ باستاعان دەلەگاتسيا كەلدى. ساپار اياسىندا قوناقتار ءوڭىر جاستارى، ستۋدەنتتەر جانە پەداگوگتەر قاۋىمداستىعىمەن بىرقاتار كەزدەسۋ وتكىزىپ، مەملەكەت باسشىسىنىڭ جولداۋىنىڭ نەگىزگى باعىتتارىن ءتۇسىندىرىپ، ونى جۇزەگە اسىرۋدىڭ ناقتى قادامدارىن تالقىلادى.
جۇمىس ساپارىنىڭ العاشقى ايالداماسى شاكارىم ۋنيۆەرسيتەتى بولدى. مۇندا ستۋدەنت جاستار مەن پروفەسسور-وقىتۋشىلار قۇرامى قاتىسقان اشىق ديالوگ ءوتتى.
كەزدەسۋدى اشقان «شاكارىم ۋنيۆەرسيتەتى» كەاق باسقارما توراعاسى دۋمان ورىنبەكوۆ قازاقستان حالقىنا ارنالعان جاڭا جولداۋعا قاتىستى قوعامدىق تالقىلاۋدىڭ ستراتەگيالىق ماڭىزىن اتاپ ءوتتى.
ء«بىز پرەزيدەنت جولداۋىنىڭ نەگىزگى باعىتتارىن جان-جاقتى تالقىلاپ، وزەكتى ماسەلەلەر بويىنشا پىكىر الماسۋ ءۇشىن جينالدىق. بۇگىنگى كەزدەسۋگە قۇرىلتاي دەپۋتاتى ايرات بازەنوۆ پەن قازاقستان حالىق كەڭەسىنىڭ مۇشەسى نۇرتاي سابيليانوۆ كەلىپ وتىر. الداعى ۋاقىتتا قازاقستاندىق جاستار ءۇشىن قانداي جاڭا پەرسپەكتيۆالار مەن مۇمكىندىكتەر اشىلاتىنىن، سونىڭ ىشىندە مانساپتىق جانە كاسىبي دامۋ ماسەلەلەرىن تالقىلايمىز»، – دەدى دۋمان ورىنبەكوۆ.
ءوڭىردى دامىتۋ تاقىرىبىن جالعاستىرعان قازاقستان حالىق كەڭەسىنىڭ مۇشەسى نۇرتاي سابيليانوۆ مەملەكەت باسشىسىنىڭ ينفراقۇرىلىمدىق باستامالارىنا توقتالىپ، ولاردىڭ ءوڭىر تۇرعىندارى ءۇشىن ماڭىزىن اتاپ ءوتتى.
«مەملەكەت باسشىسى ءوز جولداۋىندا ينفراقۇرىلىمدى دامىتۋعا ەرەكشە نازار اۋداردى. سەمەي قالاسىندا جولداردىڭ جاي-كۇيى، تۇرعىن ۇيمەن قامتاماسىز ەتۋ، سونداي-اق سۋ جانە جىلۋمەن ۇزدىكسىز قامتاماسىز ەتۋ ماسەلەلەرى ءالى دە وزەكتى. وسىعان بايلانىستى پرەزيدەنت مۇنداي ماسەلەلەردى كەشەندى شەشۋ ءۇشىن ۇلتتىق قوردان 6,5 تريلليون تەڭگە ءبولۋ جونىندە تاپسىرما بەردى»، – دەدى نۇرتاي سابيليانوۆ.
ال قۇرىلتاي دەپۋتاتى ايرات بازەنوۆ جاساندى ينتەللەكت تەحنولوگيالارىن دامىتۋ مەن تسيفرلاندىرۋ ماسەلەلەرىنە نازار اۋدارىپ، بۇل باعىتتاردىڭ جاس ماماندار ءۇشىن ۇلكەن مۇمكىندىكتەرگە جول اشاتىنىن اتاپ ءوتتى.
سونىمەن قاتار كەزدەسۋگە قاتىسۋشىلار جاستاردىڭ كاسىبي دامۋى، كادر دايارلاۋ ساپاسىن ارتتىرۋ جانە ولاردىڭ ءوڭىردىڭ قوعامدىق ومىرىنە بەلسەندى ارالاسۋى ماسەلەلەرىن تالقىلادى. مەملەكەت باسشىسى العا قويعان نەگىزگى مىندەتتەردىڭ ءبىرى – ەكونوميكانىڭ ناقتى سۇرانىسىنا ساي بىلىكتى ماماندار دايارلاۋ ەكەنى ايتىلدى.
ەركىن پىكىر الماسۋ بارىسىندا ستۋدەنتتەر وزدەرىن تولعاندىرعان سۇراقتارىن قويىپ، ناقتى ۇسىنىستارىن ورتاعا سالدى. دەلەگاتسيا وكىلدەرى ايتىلعان پىكىرلەر مەن ۇسىنىستار جيناقتالىپ، ءتيىستى مەملەكەتتىك ورگانداردىڭ قاراۋىنا جولداناتىنىن جەتكىزدى.
بۇدان كەيىن دەلەگاتسيا سەمەي قالاسىنداعى بيزنەس جانە سەرۆيس كوللەدجىنە بارىپ، وقۋ ورنىنىڭ اكىمشىلىگىمەن جانە پەداگوگيكالىق ۇجىمىمەن كەزدەستى.
قازىرگى قوعامداعى مۇعالىمنىڭ ءرولى مەن ءبىلىم بەرۋ سالاسىن قولداۋعا باعىتتالعان جۇيەلى شارالار تۋرالى ءسوز قوزعاعان نۇرتاي سابيليانوۆ پەداگوگتەردىڭ ەل بولاشاعىنداعى ماڭىزدى ءرولىن اتاپ ءوتتى.
«مەملەكەت باسشىسى ءوز جولداۋىندا ءبىلىم بەرۋ سالاسىنا ەرەكشە نازار اۋداردى. وسى باعىتتا بىرقاتار ناقتى تاپسىرمالار بەرىلدى. قازاقستاندا مۇعالىمدەردىڭ قۇقىقتارىن قورعاۋعا باعىتتالعان «پەداگوگ مارتەبەسى تۋرالى» زاڭ قولدانىستا. دەگەنمەن ءبىلىم بەرۋ سالاسىندا قاعازباستىلىق پەن پەداگوگتەردى وزدەرىنە ءتان ەمەس جۇمىستارعا تارتۋ ماسەلەلەرى ءالى دە بار. مۇنداي جاعدايلاردى تولىق بولدىرماۋ ءۇشىن زاڭنامانى جەتىلدىرىپ، مۇعالىمدەردىڭ قۇقىقتارىن قورعاۋ باعىتىنداعى جۇمىستى جۇيەلى تۇردە جالعاستىرۋ قاجەت. پەداگوگ مارتەبەسى قوعامدا ەرەكشە ورىن الۋى ءتيىس. ويتكەنى بالالارىمىزدىڭ ءبىلىم ساپاسى تىكەلەي مۇعالىمدەردىڭ ەڭبەگىنە بايلانىستى»، – دەدى نۇرتاي سابيليانوۆ.
وتاندىق ءبىلىم بەرۋ جۇيەسىن جاڭعىرتۋ تاقىرىبىن جالعاستىرعان ايرات بازەنوۆ ينكليۋزيۆتى ءبىلىم بەرۋدى جۇيەنىڭ دامۋ دەڭگەيىن كورسەتەتىن ماڭىزدى باعىتتاردىڭ ءبىرى رەتىندە اتاپ ءوتتى.
«پرەزيدەنت 2026 جىلعى 10 قازانعا دەيىن پەداگوگتەردىڭ ار-نامىسى مەن قادىر-قاسيەتىن قۇرمەتتەۋ جانە قورعاۋ ماسەلەلەرى بويىنشا كەشەندى ۇسىنىستار ازىرلەۋدى تاپسىردى. مۇنى اسا ماڭىزدى قولداۋ شاراسى دەپ سانايمىن. بۇگىندە ەلىمىزدە 7 ميلليونعا جۋىق بالا مەن وقۋشى بار. بۇل – حالىقتىڭ ۇشتەن بىرىنە جۋىعى. سونىمەن قاتار ينكليۋزيۆتى جانە ارنايى ءبىلىم بەرۋدى قاجەت ەتەتىن بالالاردىڭ سانى جىل سايىن ارتىپ كەلەدى. قازىر ولاردىڭ سانى شامامەن 237 مىڭعا جەتتى. مەملەكەت ءار بالانىڭ كەدەرگىسىز ءبىلىم الۋىنا، قۇرداستارىمەن بىرگە وقۋىنا جانە جەكە قاجەتتىلىكتەرىنە سايكەس قاجەتتى قولداۋ الۋىنا جاعداي جاساۋى ءتيىس»، – دەپ تۇيىندەدى ايرات بازەنوۆ.
تالقىلاۋ قورىتىندىسى بويىنشا پەداگوگتەر قاۋىمداستىعىنىڭ وكىلدەرى دە ءوز پىكىرلەرىمەن ءبولىستى.
«جولداۋدا ايتىلعان پەداگوگتەردى قولداۋ جانە ءبىلىم بەرۋ جۇيەسىنە ەرەكشە نازار اۋدارۋ شارالارى بىزگە ەرتەڭگى كۇنگە سەنىم ۇيالاتادى. مۇعالىم مارتەبەسىن قورعاۋ، ارتىق ەسەپتىلىكتەن ارىلتۋ جانە ينكليۋزيۆتى ورتانى دامىتۋ ماسەلەلەرىنىڭ پرەزيدەنتتىڭ جەكە باقىلاۋىندا بولۋى ءبىز ءۇشىن وتە ماڭىزدى. بۇل پەداگوگتەرگە ءوز جۇمىسىن ساپالى ءارى جاۋاپكەرشىلىكپەن جالعاستىرۋعا جىگەر بەرەدى»، – دەدى پەداگوگتەر.
