پرەزيدەنت قاسىم-جومارت توقاەۆ قازاقستان حالقىنا كەزەكتى جولداۋىندا «قارىزسىز قوعام» جوباسىنىڭ يگىلىگىن بۇكىل ەلىمىز كورۋى قاجەت ەكەنىن ايتتى، دەپ حابارلايدى «ادىرنا» ۇلتتىق پورتالى.
وتكەن جىلى نەگىزگى كاپيتالعا سالىنعان ينۆەستيتسيالار ءجىو-ءنىڭ 15% -ىن عانا قۇرادى. بۇل كوبىنەسە وتاندىق بانكتەردىڭ ەكونوميكانى دامىتۋعا از قاتىسۋىنىڭ سالدارى. پرەزيدەنتتىڭ سوزىنشە، مۇنداي احۋال ۇكىمەتتى تىكەلەي قارجىلاندىرۋمەن، كەپىلدىك جانە سۋبسيديا بەرۋمەن اينالىسۋعا ماجبۇرلەيدى.بۇل ءتاسىل ءتيىمسىز، كوپ قاراجاتتى تالاپ ەتەدى ءارى نارىقتىق ەكونوميكا قاعيدالارىنا قايشى كەلەدى. سونىمەن بىرگە ناقتى سەكتورعا بەرىلەتىن كرەديت ازايىپ جاتقاندا بانكتەر تۇتىنۋ نەسيەسىمەن اۋەستەنىپ كەتتى. وسى جاعداي قارجى جۇيەسىنە تونەتىن سىن-قاتەرلەردىڭ كوبەيۋىنە جانە ازاماتتاردىڭ شەكتەن تىس قارىزعا باتۋىنا اكەپ سوقتىردى.
مەنىڭ 2019 جىلى 500 مىڭ ازاماتتىڭ كەپىلسىز نەسيەسىن كەشىرۋ تۋرالى شەشىمىم جانە جاقىندا قابىلدانعان جەكە تۇلعالاردىڭ بانكروتتىعى تۋرالى زاڭ ماسەلەنى ءبىرشاما رەتتەدى. بىراق احۋالدى ءبىرجولا تۇزەۋ ءۇشىن جاڭادان جۇيەلى شارالار قابىلداۋ قاجەت. سونىمەن قاتار ازاماتتاردىڭ قارجى ساۋاتىن ارتتىرۋ وتە ماڭىزدى، - دەدى پرەزيدەنت.بۇل رەتتە قاسىم-جومارت توقاەۆ «AMANAT» پارتياسىنىڭ «قارىزسىز قوعام» جوباسىن ەرەكشە اتاپ ءوتتى.
سونىڭ ارقاسىندا ەلىمىزدىڭ 8 ايماعىندا 20 مىڭنان استام ادام قارجىلىق ساۋاتىن ارتتىردى. ولاردىڭ كوپشىلىگى – 10 جانە ودان دا كوپ نەسيە العان ادامدار. بۇل جوبا از ۋاقىتتا ءوزىنىڭ تيىمدىلىگىن كورسەتتى. ۇكىمەتكە «Amanat» پارتياسىمەن بىرلەسىپ، ونىڭ اۋقىمىن كەڭەيتۋدى تاپسىرامىن. «قارىزسىز قوعام» جوباسىنىڭ يگىلىگىن بۇكىل ەلىمىز كورۋى قاجەت، - دەدى توقاەۆ.
