اباي وبلىسىندا ۇلتتىق مەرەكە – رەسپۋبليكا كۇنىنىڭ قارساڭىندا حح عاسىردىڭ باسىندا ءومىر سۇرگەن ۇلت قايراتكەرلەرىنىڭ اعارتۋشىلىق مۇراسىن جاڭعىرتۋعا ارنالعان كوپتومدىق جيناقتىڭ تۇساۋكەسەرى ءوتتى. شاراعا وبلىس اكىمى بەرىك ءۋالي، جازۋشى، ءدىنتانۋشى قايرات جولدىبايۇلى، ايماقتىڭ زيالى قاۋىم وكىلدەرى قاتىستى.
ەل تاۋەلسىزدىگىنىڭ 35 جىلدىعىنا وراي «ميراس» سەرياسى اياسىندا ازىرلەنگەن 35 تومدىق ەڭبەك بالالارعا ارنالعان وقۋلىقتاردان، تانىمدىق ەڭبەكتەردەن، اۋدارمالاردان قۇرالعان. العاش رەت جارىق كورىپ وتىرعان بىرەگەي جيناق ءبىلىم بەرۋ، عىلىمدى دامىتۋ جانە ۇلتتىق سانانى قالىپتاستىرۋ جولىندا ەڭبەك ەتكەن قازاقتىڭ كورنەكتى تۇلعالارىنىڭ رۋحاني مۇراسىن بۇگىنگى وقىرمانعا تانىستىرۋدى كوزدەيدى.
ايماق باسشىسى جوبا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستامالارىن قولداۋ ماقساتىندا قولعا الىنعانىن اتاپ ءوتتى.
«بيىل 16 مامىر كۇنى قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ ۇلت بولاشاعىن ايقىندايتىن، ادام كاپيتالىن دامىتۋعا تىكەلەي ىقپال ەتەتىن تاريحي جارلىققا قول قويدى. بۇل ماڭىزدى قۇجات كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ شارالارىن قامتيدى. مەملەكەت باسشىسىنىڭ تاپسىرماسىنا وراي ءبىز قاسيەتتى اباي وڭىرىندە وسى باعىتتا كوپتەگەن جۇمىستى باستادىق. سولاردىڭ ءبىرى دە بىرەگەيى – سىزدەردىڭ قولدارىڭىزعا تيگەلى وتىرعان «ميراس» سەرياسىنىڭ اياسىندا ازىرلەنگەن 35 تومدىق جيناق»، – دەدى بەرىك ءۋالي.
جيناققا تۇراعۇل ابايۇلى، سپانديار كوبەەۆ، ءاليحان بوكەيحان، احمەت بايتۇرسىنۇلى، مىرجاقىپ دۋلاتۇلى، جۇسىپبەك ايماۋىتۇلى، حالەل دوسمۇحامەدۇلى، ماعجان جۇمابايۇلى، مۇحتار اۋەزوۆ جانە باسقا دا قازاق زيالىلارىنىڭ ەڭبەكتەرى ەنگەن. كىتاپتار مازمۇنىنا قاراي «جاراتىلىستانۋ»، «ادەبي اۋدارمالار» جانە «بالالارعا بازارلىق» دەپ اتالاتىن ىرگەلى ءۇش بولىمگە توپتاستىرىلعان.
بۇل سول كەزدەگى قازاق زيالىلارىنىڭ حالىقتى اعارتۋ، جۇرتتى تاربيەلەۋ، قازاق بالالارىن الەمدىك عىلىم مەن مادەنيەتتەن سۋسىنداتۋ ماقساتىنداعى ۇلتقا قىزمەتىنىڭ ونەگەلى ۇلگىسى. سول زاماندا قانداي ماڭىزدى بولسا، قازىر دە قۇندىلىعىن جويماعان بىرەگەي ەڭبەك.
تۇڭعىش رەت ءبىر جوبا اياسىندا جارىق كورگەن تاريحي ەڭبەكتەر قازىرگى وقىرماننىڭ جاس ەرەكشەلىكتەرىنە بەيىمدەلىپ، ساپالى يلليۋستراتسيالارمەن تولىقتىرىلعان. بۇل كىتاپتاردىڭ مازمۇنىن بالالارعا تۇسىنىكتى ەتىپ جەتكىزۋگە جانە كىتاپ وقۋعا دەگەن قىزىعۋشىلىعىن ارتتىرۋعا مۇمكىندىك بەرەدى.
مازمۇنى تەرەڭ، ءمان-ماڭىزى زور جيناق وبلىستاعى بارلىق مەكتەپتەر مەن كوللەدجدەرگە تاراتىلادى.
