Abai oblysynda ūlttyq mereke – Respublika künınıŋ qarsaŋynda HH ǧasyrdyŋ basynda ömır sürgen ūlt qairatkerlerınıŋ aǧartuşylyq mūrasyn jaŋǧyrtuǧa arnalǧan köptomdyq jinaqtyŋ tūsaukeserı öttı. Şaraǧa oblys äkımı Berık Uäli, jazuşy, dıntanuşy Qairat Joldybaiūly, aimaqtyŋ ziialy qauym ökılderı qatysty.
El Täuelsızdıgınıŋ 35 jyldyǧyna orai «Miras» seriiasy aiasynda äzırlengen 35 tomdyq eŋbek balalarǧa arnalǧan oqulyqtardan, tanymdyq eŋbekterden, audarmalardan qūralǧan. Alǧaş ret jaryq körıp otyrǧan bıregei jinaq bılım beru, ǧylymdy damytu jäne ūlttyq sanany qalyptastyru jolynda eŋbek etken qazaqtyŋ körnektı tūlǧalarynyŋ ruhani mūrasyn bügıngı oqyrmanǧa tanystyrudy közdeidı.
Aimaq basşysy joba Qazaqstan Respublikasynyŋ Prezidentı Qasym-Jomart Toqaevtyŋ kıtap oqu mädenietın damytu jäne zerdelı ūlt qalyptastyru jönındegı bastamalaryn qoldau maqsatynda qolǧa alynǧanyn atap öttı.
«Biyl 16 mamyr künı Qazaqstan Respublikasynyŋ Prezidentı Qasym-Jomart Kemelūly Toqaev ūlt bolaşaǧyn aiqyndaityn, adam kapitalyn damytuǧa tıkelei yqpal etetın tarihi Jarlyqqa qol qoidy. Būl maŋyzdy qūjat kıtap oqu mädenietın damytu jäne zerdelı ūlt qalyptastyru şaralaryn qamtidy. Memleket basşysynyŋ tapsyrmasyna orai bız qasiettı Abai öŋırınde osy baǧytta köptegen jūmysty bastadyq. Solardyŋ bırı de bıregeiı – Sızderdıŋ qoldaryŋyzǧa tigelı otyrǧan «Miras» seriiasynyŋ aiasynda äzırlengen 35 tomdyq jinaq», – dedı Berık Uäli.
Jinaqqa Tūraǧūl Abaiūly, Spandiiar Köbeev, Älihan Bökeihan, Ahmet Baitūrsynūly, Mırjaqyp Dulatūly, Jüsıpbek Aimauytūly, Halel Dosmūhamedūly, Maǧjan Jūmabaiūly, Mūhtar Äuezov jäne basqa da qazaq ziialylarynyŋ eŋbekterı engen. Kıtaptar mazmūnyna qarai «Jaratylystanu», «Ädebi audarmalar» jäne «Balalarǧa bazarlyq» dep atalatyn ırgelı üş bölımge toptastyrylǧan.
Būl sol kezdegı qazaq ziialylarynyŋ halyqty aǧartu, jūrtty tärbieleu, qazaq balalaryn älemdık ǧylym men mädenietten susyndatu maqsatyndaǧy ūltqa qyzmetınıŋ önegelı ülgısı. Sol zamanda qandai maŋyzdy bolsa, qazır de qūndylyǧyn joimaǧan bıregei eŋbek.
Tūŋǧyş ret bır joba aiasynda jaryq körgen tarihi eŋbekter qazırgı oqyrmannyŋ jas erekşelıkterıne beiımdelıp, sapaly illiustrasiialarmen tolyqtyrylǧan. Būl kıtaptardyŋ mazmūnyn balalarǧa tüsınıktı etıp jetkızuge jäne kıtap oquǧa degen qyzyǧuşylyǧyn arttyruǧa mümkındık beredı.
Mazmūny tereŋ, män-maŋyzy zor jinaq oblystaǧy barlyq mektepter men kolledjderge taratylady.
