12 ماۋسىم كۇنى ۇكىمەتتە جەدەل جيىن ءوتتى. پرەمەر-مينيستر ءاليحان سمايىلوۆ جانە مينيسترلەر اباي وبلىسىنداعى ءورتتى جويۋ جانە ودان زارداپ شەككەن وتباسىلارعا قاجەتتى قولداۋ شارالارىن كورسەتۋ ماسەلەلەرىن تالقىلادى، دەپ حابارلايدى "ادىرنا" ۇلتتىق پورتالى primeminister.kz سايتىنا سىلتەمە جاساپ.
كەڭەس توتەنشە جاعداي كەزىندە قازا تاپقانداردى ءبىر مينۋت ۇنسىزدىكپەن ەسكە الۋدان باستالدى.
ءاليحان سمايىلوۆ 10 كۇن ىشىندە وقيعانىڭ بارلىق ءمان-جايىن انىقتاپ، ءتيىستى قورىتىندى جاساۋدى تاپسىردى.
مەملەكەت باسشىسىنىڭ اباي وبلىسىنداعى جەدەل شتاب وتىرىسىندا بەرگەن تاپسىرمالارىن ورىنداۋ ءۇشىن قازا تاپقانداردىڭ وتباسىلارىنا «قازاقستان حالقىنا» قورىنان 7 ملن تەڭگەدەن، سونداي-اق كامەلەتكە تولماعان ءار بالاعا 2 ميلليون تەڭگەدەن تولەنەتىن بولادى. بۇدان بولەك، قازا تاپقانداردىڭ وتباسىلارىنا جانە زارداپ شەككەندەرگە قاجەتتى قولداۋ شارالارىن كورسەتۋ ماقساتىندا ارنايى قور قۇرىلدى.
سونىمەن قاتار 40-تان استام قازاقستاندىق جوو ورتتەن زارداپ شەككەن وتباسىلاردىڭ ستۋدەنتتەرىنە گرانتتار مەن جاتاقحانادان ورىن بەرۋگە دايىن. وعان قوسا اقىلى نەگىزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كوزدەلگەن.
ۇكىمەت باسشىسى تابيعاتتى قورعاۋدى كۇشەيتۋ ءۇشىن بىرقاتار شارالاردى قولعا الۋ قاجەت ەكەندىگىن ايتتى. اتاپ ايتقاندا، بەينەباقىلاۋ جانە مونيتورينگ جۇيەلەرىن ەنگىزۋدى، ماتەريالدىق جانە تەحنيكالىق تۇرعىدان جاراقتاندىرۋ قاجەتتىگىن اتاپ ءوتتى.
ەسكە سالا كەتەيىك، 8 ماۋسىم كۇنى اباي وبلىسىنداعى ورمان ورتكە وراندى. ورتپەن كۇرەسكە تۇسكەن 14 ورمانشى قازا تاپتى. اباي وبلىسى اكىمىنىڭ ورىنباسارى ديميتري گاريكوۆتىڭ ايتۋىنشا، ءورت 2 رەت تۇسكەن نايزاعايدان تۇتانعان.
12 ماۋسىم ەلىمىزدە ازا تۇتۋ كۇنى بولىپ جاريالاندى.
الاپات ورتپەن كۇرەس ءالى ءجۇرىپ جاتىر.
"ادىرنا" ۇلتتىق پورتالى
اباي وبلىسى
ورتكە ورانعان
قر پرەمەر-ءمينيسترى ءاليحان سمايىلوۆ
سەمەيدەگى ءورت
قازاق تاپقان ورمانشىلار
“قازاقستان حالقىنا” قورى
